Мәжілістің баспасөз алаңында БАҚ өкілдерінің сауалдарына жауап берген ҚР Парламенті Мәжілісінің төрағасы Ерлан Қошанов Amanat партиясының атынан президент сайлауына түсу туралы жоспары жоқ екенін айтты, деп хабарлайды Egemen.kz.
«Ондай мәселені қарастырып отырған жоқпын. Жоспарымда да, ойымда да жоқ», деді Мәжіліс төрағасы.
«Президент партиядан шыққаннан кейін саси бәсекелестік артады. Менің ойымша, бұл партия жұмысында көрінеді. Біз Парламенттегі орындар үшін өзгелермен тең жағдайда күресуіміз керек. Бұл тек саяси бәсекелестікті күшейтеді. Amanat басқарушы партия және ол саяси күреске дайын», деді Ерлан Қошанов.
Сондай-ақ ол Мәжіліс спикерінің басқарушы партияның төрағасы болуында ешқандай әділетсіздік жоқ деп есептейтінін жеткізді.
«Менің ойымша, ешқандай әділетсіздік жоқ. Заңнама тұрғысынан да қарама-қайшылық жоқ. Мен Мәжілістегі бұл орным мен партия төрағалығын заңды түрде алып отырмын. Бұл менің партияластарымның сенімі», деді Мәжіліс төрағасы.