Орталық референдум комиссиясының төрағасы Нұрлан Әбдіров, Орталық референдум комиссиясының хатшысы Мұхтар Ерман Түркістан облысында болып, бірқатар аудан мен Арыс қаласындағы референдум учаскелерінің жай-күйімен танысты.
Арыс қаласының Мәдениет үйінде жиналған халықпен кездесіп, аумақтық референдум комиссиялары мен жергілікті атқарушы органдар өкілдерінің қатысуымен республикалық референдумды әзірлеу мен өткізу туралы семинар-кеңес өткізді. Жиында Нұрлан Әбдіров референдумның мемлекет болашағына оң өзгеріс әкелетінін айтып, алда өтетін референдумды өткізудегі ұйымдастыру жұмыстарына тоқталды. Жиын барысында Түркістан облысы әділет департаментінің басшысы Мұхит Тұрғараев «Қазақстан Республикасының Конституциясына өзгерістер мен толықтырулар енгізу туралы» Қазақстан Республикасы Заңының жобасы туралы», Түркістан облысы прокурорының орынбасары Саян Келдібеков «Республикалық референдум туралы заңнаманы бұзғаны үшін жауапкершілік» тақырыбында түсіндірме жұмыстарын жүргізсе, Орталық референдум комиссиясы аппаратының талдау және коммуникациялар бөлімі меңгерушісінің орынбасары Ғалымжан Жалмұрзаев «Республикалық референдум қарсаңындағы үгіт және дауыс беру күні бұқаралық ақпарат құралдарының өкілдерін аккредиттеу туралы» тақырыбында БАҚ өкілдеріне ақпарат берді.
Сондай-ақ бұл күні Ордабасы ауданының орталығы Темірланда Қажымұқан ауылдық округінде орналасқан референдум учаскелерінің жай-күйімен танысқан комиссия төрағасы аудандық Мәдениет үйінде аумақтық референдум комиссиялары мен жергілікті атқарушы органдардың өкілдерімен кездесті. Жиында халық мол үміт артып отырған республикалық референдумды әзірлеу мен өткізу туралы жұмыс барысы тексерілді. Нұрлан Мәжитұлы референдумның мемлекет болашағына оң өзгеріс әкелетінін айтып, алда болатын саяси науқанды өткізудегі ұйымдастыру жұмыстарына тоқталды.
Сондай-ақ жиында референдум өткізу бойынша жергілікті атқару органдарының тарапынан атқарылып жатқан жұмыстардың барысы туралы облыс әкімінің орынбасары Сәкен Қалқаманов, аумақтық референдум комиссиясының төрағасы Әлібек Өмірәлиев ұйымдастыру және дауыс беру учаскелерінде референдум комиссияларының қызметінің ерекшеліктері туралы ой-пікірлерін ортаға салды. Жиыннан соң Орталық референдум комиссиясының төрағасы Темірландағы Ш.Уәлиханов атындағы мектеп-гимназиясы, Темірлан жалпы орта мектебі, С.Нұрмағамбетов атындағы жалпы орта мектебіндегі референдум учаскелерін аралап, комиссия мүшелеріне жұмысты үйлестіру бойынша бағыт-бағдар берді.
Түркістан облысы