Ел Президенті Қасым-Жомарт Тоқаевтың бастамасымен 5 маусым күні жалпыхалықтық референдум өтетіні белгілі. Дәл сол күні Ата Заңның үштен бір бөлігіне өзгерістер мен толықтырулар енгізу мәселесі халықтың қалауымен шешімін табады.
Күні кеше Парламент Сенатының депутаты Ақылбек Күрішбаев пен «Қазақ қызы» қоғамдық ұйымының төрағасы Қарақат Әбден Жоғары көлік және коммуникация колледжінің қызметкерлері және студенттерімен кездесіп, «Референдум – демократиялық қоғамның маңызды құралы» тақырыбы төңірегінде әңгіме өрбітті.
Кездесу барысында елордадағы техникалық және кәсіптік білім беру мекемелері директорлар кеңесінің төрағасы, Конституциялық реформаларды түсіндіру жөніндегі Нұр-Сұлтан қаласы бойынша республикалық қоғамдық штабтың басшысы Зұлпұхар Ғайыпов сөз алып, саяси реформаның мән-маңызына тоқталды.
Сенатор Ақылбек Қажығұлұлы жалпыхалықтық референдумның Жаңа Қазақстанды қалыптастырудағы маңызына кеңінен тоқталды. Сондай-ақ ол өз сөзінде референдумға енгізілуге тиіс өзгерістер мен толықтырулар мемлекетіміздің қарапайым азаматының өмір сүру дағдысына қаншалықты оң әсер ететіні жөнінде де нақты мысалдар арқылы пікірін білдірді.
Кездесу барысында қатысушылар тарапынан қойылған сауалдарға нақты жауап берген Сенат депутаты әр бап бойынша енгізілуі ықтимал өзгерістерге жеке-жеке тоқталды. Кейіннен сөз сөйлеген Қарақат Жақсылыққызы еңбек ұжымына дауыс берудің ережелері мен шарттарын түсіндіріп, референдумға белсене қатысуға шақырды.