Қоғамға бір өзгерістің керектігі анық сезілген еді. Сол тұрғыдан алып қарағанда негізі конституциялық реформаларды қамтыған жалпыхалықтық референдумның өткізілгені дұрыс болды.
Саяси науқанға алғашқылардың бірі болып барып, таңмен таласа дауыс бердім. Болашақ ұрпақтың жарқын келешегі үшін өз таңдауымды жасадым.
Өнер адамдарының барлығы да саяси науқаннан тыс қалмағанына сенімдімін. Конституцияның 33 бабына енгізілетін өзгерістердің барлығын толықтай қолдаймын. Мемлекет басшысы Қасым-Жомарт Тоқаевтың суперпрезиденттік басқарудан бас тартып, ықпалды Парламент құруға деген ниеті көңіл қуантады. Қазақстан Президенті Жаңа Қазақстан идеясын ұсынғаны мәлім. Соның негізінде әділетті қоғам құру жолында жанкешті жұмыстар атқарылып жатқанына ешкімнің күмәні жоқ. Баршамыздың көкейімізде әділеттілік болса деген арман тұрды. Енді сол арманымыз ақиқатқа айналатын кез келді. Сол үшін де мен білетін өнер адамдарының барлығы өз таңдауларын жасады. Олар жаңа тұрпаттағы Қазақстанның жарқын қадамдарын көргісі келеді. Біздің де ой солардың пікірімен бір арнаға тоғысып тұр. Биліктің заңды Парламент арқылы қабылдамай, халықпен ақылдасқаны көңілге қонды. Жаңа биіктерге ұмтылған әділетті қоғамымыздың келешегі кемел болсын!
Тілектес МЕЙРАМОВ,
Қазақстанның халық әртісі