Мұнайлы өңірде кәдімгі қанттың қат дүниеге айналар түрі бар. Супермаркеттер мен дүкендер сөресінен әлсін-әлсін «жоғалып» кетеді. Енді оның бағасы 70 пайызға қымбаттағалы тұр.
Облыстық кәсіпкерлік және туризм басқармасының басшысы Нұрбол Жаңабековтің айтуынша, сәуір айынан бері 536 тонна қант жеткізіліпті. Оның 408 тоннасы «Идеал Маркет» ЖШС-нің сауда желілеріне, ал 128 тоннасы өзге супермаркеттерге берілген. Енді Алматы облысындағы «Көксу қант» зауытынан 408 тонна қант жеткізуге келісім жасалған.
– Супермаркет желілерінде қант әр адамға үш килодан сатылады. Өйткені жеке дүкен иелері немесе басқа да тұтынушылар қантты бір мезетте төмен бағамен көп мөлшерде сатып алуы мүмкін. Сөйтіп, қант бағасына үстеме қосып, қымбатқа сатады. Сондықтан, супермаркеттерде қант белгілі бір мерзімде ғана сөреге шығарылады, – дейді Н.Жаңабеков.
Сауда орындарындағы азық-түлік бағасына рейд жүргізіліп жатыр. Мұндай мониторингті аптасына бірнеше рет жүргізу көзделген. «Бұл азық-түлік бағасының тұрақтылығын, негізсіз өсуіне бақылау үшін қолға алынды. Мақсат – тұрғындарға азық-түліктің қолжетімді бағамен ұсынылуын қадағалау», дейді басқарма басшысы.
«Идеал маркет» ЖШС қойма логистикасы бекетінің директоры Қуаныш Әлімбетовтің мәліметінше, осы аптада Алматы облысындағы «Көксу қант» зауытынан 2 вагонмен 66 тонна қант жеткізілген. Бұл тауар «Идеал» және «Лидер» супермаркеттерінің 35 сауда нүктесіне сатылымға шығарылады.
– Қазір Атырауда бөлшек саудадағы қанттың бағасы – 385 теңге. Енді сатылымға шығарылатын қанттың 1 килосы 500-517 теңгеден басталады. Бұған тасымалдау құнының қымбаттауы себеп болып тұр. Жақын күндері отандық зауыттан тағы екі вагонмен қант жеткізу көзделіп отыр, – деп мәлім етті Қуаныш Әлімбетов.
Атырау облысы