Саяжай тұрғындары өркениетке сай өмір сүруге қақылы

Бұған дейін де облыс орталығындағы шешімін таппай келген өткір тақырып қала маңындағы елді мекендерге қатысты еді. Шынымен, Талдықорғанның іргесіндегі саяжайларда проблема шаш-етектен. Соның ішінде ауыз су, газ, электр желісі, жол инф­рақұрылымдарының болмауы, мектеп пен дәрігерлік амбулатория жетіспеушілігі тұрғындарды жиі мазалайды. Жалпы, саяжайларды қойып, қаланың өзінде сумен жабдықтау жүйесінің 62 пайызы, кәріз жүйелерінің 64 пайызының тозығы жеткен. Мемлекет бұл мәселемен айналысуда. Мысалы, былтыр қалаға қарайтын «3-бөлімше» аталатын аймақта ауыз сумен қамту жүйесі салынса, биыл «Ұлан» әскери қалашығына, Еркін ауылдарына ауыз су тарту жұмыстарының құры­лысы басталмақ. Саяжай аумақ­тарын газдандыру жайы да сын көтермейді. Қазір қаланың өзінде 30 мыңдай абонент қана көгілдір отын желісіне қосылған. Енді коттедж қалашығын, басқа да бірнеше елді мекен мен саяжай массивтерін газдандыру ісі күн тәртібінде тұр.

Күн тәртібі демекші, қала маңындағы 20 мың адам тұ­рып жатқан 12 саяжайды инфра­құрылыммен қамтып, абаттандыру жұмыстарын жал­ғас­тыру кезек күттір­мейді. Қазір «Ключи», «Ал­малы», «Қаратал» саяжай бірлес­тік­теріне ұзындығы 29,7 ша­қы­рым болатын ауыз су жүйе­сі тартылған. Ал «Үйтас» саяжайының 4,4 шақырым жолы жөнде­ліп, «Шайқорған», «Агропро­мыш­ленник», «Ме­рекелік» саяжай­ларының 39 көшесі­н­е қиыр­шықтас төселді. «Үйтас» пен «Қызыл тас» бір­лес­тігінің негізгі көшелері жа­­рық­тандырылды. Биыл «Ащыбұлақ» саяжайына ауыз су жүйесін тартуға 206,4 млн теңге қаржы бөлінді. Енді «Қызыл тасқа» су құ­бы­рын жүргізу бастамасы қарас­тырылып жатыр.

Соған қарамастан тұрғын­дар облыс әкімдігіне саяжай­ларға қатысты көптеген сауал қойып отыр. Мәселен, үй­тастықтар электр жарығын тарту, жол жөндеу, мектеп салу қажеттігіне, суармалы судың жетіспеушілігіне, ор­натылған камералардың жұмыс істемейтініне ша­ғымданса, Пригородный ауылының тұрғындары 2020 жылы тартылған газ құбы­ры әлі күнге іске қосылма­ға­нын, ауылға жүретін №16 авто­бус­тың қатынау жиілігін ұл­ғайту және үлкен автобус шығару керегін айтады. «Қызылтас», «Мерекелік» сая­жай­лары­ның азаматтары да осы маз­мұн­дағы мәселелер­ді жиі көтереді. Демек Жеті­су облысының әкімі болып жаңадан тағайындалған Бей­біт Исабаев мырзаның алдағы жұмысына сын болатын мәселе жеткілікті.

– Қала маңындағы саяжайларда 6 269 тұрғын үй бар. Онда барлығы 20 мың адам тұрады. «Алматы», «Ащыбұлақ», «Қы­зыл­тас», «Мерекелік», «Үй­тас» саяжай қоғамдары бо­йын­­ша жоспарлау жобалары әзірленіп, бекітілді. Шай­­қор­ған, «Сарыарқа» және «Қара­тал» саяжайларына инф­ра­­құ­ры­лым тарту бойын­ша шара­­лар жүргізілуде. Ал қала мен қала маңындағы елді мекендер­ді газбен қам­тамасыз ету мәселесі де кезең-кезеңімен шешімін табады. Бүгінгі таңда газға 28,5 мың абонент қосылған. Қаланы газдандыру жобасы 4 кезеңге және 22 іске қосу кешеніне бөлінген. Бірінші  кезең бойынша 5 327 абонент, екінші кезең бойынша 15 792, үшінші кезең бойынша 4 260, төртінші кезең бо­йынша 2 897 абонент көгілдір отынға қосылады. Газға қосылу құны 300 мың теңгеден 920 мың теңге мөлшерінде, – дейді Талдықорған қаласының әкімі Әсет Масабаев.

Жалпы, бұған дейін облыс­та 215 мыңнан астам адам­ның саяжай бірлестіктерін­де тұратыны айтылған. Яғни Тал­дықорғандағы жағдай осын­­ша адамның бәріне ортақ мәсе­ле екені анық. Оның ішін­де инфрақұрылым мәселесі бірінші орында тұр. Әрине, бұл жағдайды түбегейлі шешу үшін алдымен саяжайларға елді мекен мәртебесі берілуі керек. Ал ол үшін әкімдік қаланың бас жоспарын қайта әзірлеуге тиіс екен. Бұл уақыт пен ақшаны және Үкіметтің келісімін қажет етеді. Яғни алдағы кезең­де Талдықор­ған қаласының ма­ңындағы сая­жайлардың ғана емес, тұтас облыс аумағын­дағы жаң­­ғыр­туды қажет ететін ауыл­­дар­дың жағдайын оңалту – өңір тұрғындарының заман­ға сай өмір сүруін қамтама­­сыз ету ғана емес, тұтас еліміз­дегі қор­­даланған әлеуметтік проб­ле­маларды жоюдың да ал­ғышарты болмақ.

Жетісу облысы