Конфуций үнсіздікті ешқашан сатпайтын адал досқа теңейді. Көпірген көп сөз тыныштықтың берекесін алады. Ал үнсіздікті сейілткіңіз келсе, ақылды әңгіме айтыңыз. Табиғат дүниесі тым-тырыс, меңіреу қалыпта жаныңа жылу құяды. У-шудан жалыққан сәтте самал желмен тербелген ағаш жапырақтарының сыбдырына құлақ түрсеңіз, көңіліңіз гүлдейді. Десе де ұзақ ой үстіндегі қоғамның үнсіздігінен қорқу қажет.
Жым-жырт ойынын білесіз бе? Біреу күліп, не сөйлесе айыпқа тартады. Жас суретші Нұрбол Нұрахметтің «Ас бөлме» картинасындағы кейіпкерлер сол ойынды ойнап отырған секілді. Мұндағы адамдар кешкі ас ішуге емес, Леонардо да Винчидің «Құпия жиынындағыдай» әлдебір жұмбақтың шешімін таппай іштей аласұрып, үн-түнсіз езілуде. Дөңгелене құралған композицияда үстел басында әлдененің күрмеуін шеше алмай отырған ер адамдар бейнеленген. Жас жігіттердің жартылай жалаңаш берілуі жеке кеңістіктің, өздеріне тән шағын әлемінің көрінісі.
Шығармада елдегі аумалы-төкпелі оқиғаларға қоғамның жеке көзқарасы суреттелген. Авторды толғандырған мәселенің бірі – жайбарақаттылық. Дастарқан басында айтылған әңгіменің еш маңызға ие емес екенін, ас бөлмеде батыр болуға әуес жастардың әрекеті анық байқалады. Үш жігіт бір-бірімен үнсіз, бейнебір іштей тілдесетіндей. Туындыдағы екі кейіпкер артқы жағынан, ту сыртынан алынып жазылса, ал үшіншісі басын төмен иген кейіпте. Бұлардың ешқайсысы көрерменмен диалогқа түспейді.
Композициядағы үш жігіт те бір кеңістікте отыр, бірақ әрқайсысы – жалғыз. Үш түрлі көңіл күйдің лебі еседі. Бірінің – іске дайындығы байқалса, бірінің – ноутбук арқылы өзге кеңістіктегі адаммен тілдесу сәті берілген. Үшіншісінің мазасыздығы анық көрініп тұр. Мұны жас жігіт денесінің оғаш орналасуынан-ақ аңдаймыз.
«Ас бөлме» туындысындағы бөлменің қара фонында ашық түсті детальдар анық көрінеді. Ал дастарқан үстел үстіне төселмей, ілініп тұрған секілді әсер қалдырады. Әйтсе де жағалай отырған кейіпкерлер қолдарын үстел үстіне тіреген. Мұндағы натюрморт элементтеріне қатаңдық тән. Олар қарапайым әрі символикалы.