Қала орталығында орналасқан букмекерлік кеңселердің біріне бетперде киген екі жігіт кіріп, пышақтарын жалаңдатып жұртты қорқытып, кассадағы 60 мың теңге мен ұялы телефонды алып, тайып тұрған. Біраздан соң ес жиған букмекерлік кеңсенің қызметшісі ішкі істер органына хабар берген.
Осыдан кейін барлық полиция нарядтарына тапсырма беріліп, іздестіру шаралары жүргізіледі. Жедел басқару орталығының бейнебақылаушы-инспекторы полиция лейтенанты Руслан Дәулетов сол маңда орналасқан бейнебақылау камерасы арқылы шолу жұмыстарын жүргізіп, сезікті екі азаматты байқайды. Аталған екі жігітті тексеру үшін жол-патрульдік полиция нарядтарына нұсқау береді. Тексеру барысында екі азаматтың қарақшылық қылмысқа қатысы барлығы анықталады. Жиырмаға жаңа жеткен жас жігіттер тергеу барысында жасаған қылмыстарын толық мойындайды. Олардың үстінен ҚК-нің 179-бабы 2-бөлігі бойынша қылмыстық іс қозғалды.
Жалпы, жедел басқару орталығының нақты іс-әрекетінің нәтижесінде 2014 жылдың 3 айында 71 қылмыс ашылып отыр. Олардың ішінде 30 бұзақылық қылмыс, 28 авторлық және сабақтас құқықтарды бұзу, 7 ұрлық, 3 автокөлікті заңсыз иелену, 2 тонау, 1 қарақшылық бар. Сонымен қатар, әртүрлі бағыттағы 8131 құқық бұзушылық анықталған.
Ержан БАЙТІЛЕС,
«Егемен Қазақстан».
Қызылорда облысы.