Шиелі ауданында бір күнде Ақмая, Алғабас ауылдары газға қосылды. Осыған орай ұйымдастырылған іс-шараға аудан тұрғындарымен кездесуге келген облыс әкімі Нұрлыбек Нәлібаев қатысып, осы күнді көптен күткен тұрғындарды қуанышымен құттықтады. Халықтың тұрмысына қажетті ауыз су, газ тарту, жол салу мәселелерінің кезең-кезеңімен шешілетінін айтып өтті.
– Биыл аудан орталығы – Шиелі кенті газбен толық қамтылды. Жақаев, Бидайкөл, Байсын, Н.Бекежанов, Қодаманов елді мекенінің тұрғындары «көгілдір отын» игілігін көруге мүмкіндік алды. Табиғи газ – ауылдағылардың қолын от жағып, күл шығарудан босатумен қатар, қоршаған ортаны қорғауға, орман қорын сақтауға мүмкіндік береді, – деді облыс басшысы.
Елді мекенді газдандыруды тұрғындар жыл сайынғы есепті кездесуде көтеріп келген екен. Ақмая ауылына табиғи газ тарту үшін республикалық, жергілікті бюджеттерден 460 млн теңге қаралған. Ал Алғабас ауылына 488 млн теңге бөлінген. Бүгінде ауданды табиғи газбен қамту үлесі 56,4%-ды құрап отыр.
Алдағы уақытта аудандағы Бестам, Досбол датқа, Еңбекші, Жиделіарық елді мекендеріне газ құбырын жүргізуге қажетті бюджеттік өтінім тапсырылса, Алмалы, Тәжібаев ауылдары тұрғындары «көгілдір отынға» қол жеткізу үшін жоба-сметалық құжаттамалары әзірленіп, сараптамаға ұсынылды.
Биыл облыста ауылдарды газдандыру бойынша 13 жобаны іске асыру басталса, оның 7-еуі осы жылы аяқталады. Нәтижесінде, 15 мыңнан астам халқы бар 7 елді мекен табиғи газға қосылып, оны тұтынатын халық санының үлесі 68 пайызға жетпек.
Шиелідегі 2 ауыл табиғи газға қосылған күні көршілес Жаңақорған ауданындағы Бірлік, Қыраш елді мекендеріне ауылішілік газ тарату желілерін тарту басталды. Осы жұмыс аяқталғанда Бірлікте 6 әлеуметтік нысан, 440 үй, Қыраш ауылында 5 әлеуметтік нысан мен 124 үй газдандырылады. Сонымен қатар аудандағы Төменарық, Шалқия, Құттықожа, Жайылма, Кейден ауылдарына газ желісін тарту жобалары әзірленіп, мемлекеттік сараптама қорытындылары алынған.
Қызылорда облысы