Маңғыстау облыстық перинаталдық орталығында Айым, Гүлім және Нұрым есімді үшем дүниеге келді. Биыл Ақтауда осымен екінші рет үшем дүниеге келді. Жалпы, жыл басынан бері облыстық перзентханада 4 319 нәресте жарық дүние есігін ашқан болса, соның 85-і егіздер.
Барлығы да күтпеген жерден болды. Өзіміз де таңғалдық. Табиғи жолмен болды, ЭКО емес. Үшемдерге дейін де үш баламыз болған. Жолдасымның анасы да егіздің сыңары. Үшеміміз өмірге келген соң жақындарымызды көмекке шақырдық. Жүктілік барысында бірден үш сәби болатынын білген жоқпын. Сондықтан да дәрігерлердің кеңесімен кесарь тілігі арқылы босануды жоспарладық. Барлығы сәтті шықты. Медицина қызметкерлеріне үлкен рахмет айтамын,– деді үшемнің анасы Амангүл Тасибекова. Білікті медицина мамандарының қарауында болған анасы мен нәрестелердің жағдайы тұрақталған соң үйіне жіберілді.
– Өмірге келген бір ұл мен екі қыздың салмағы 2 кг 286 г, 2 кг 280 г және 1 кг 880 г құрайды. Бөбектердің дені сау болсын. Еліміздің қалаулы азаматтары болып өссін, – деді «Ана мен бала» орталығының директоры Ж.Епенова.
Маңғыстау облысы