Ұлттық музейде Қазақстан мен Мажарстан мемлекеттері арасындағы дипломатиялық қарым-қатынасқа 30 жыл толуына орай, Мажарстан өнер академиясының мүшесі, графика суретшісі, аниматор, жазушы, Кошут атындағы ұлттық сыйлықтың лауреаты Иштван Оростың «Суретке салынған уақыт» атты көрмесі ашылды.
Салтанатты рәсімде музей директорының міндетін атқарушы Айбек Сыдықов екі ел арасындағы мәдени байланыстың маңыздылығына тоқталды.
«Әрбір елдің ұлттық тілі, салт-дәстүрі мен әдет-ғұрпы болса да өнердің шекарасы, шеті мен шегі жоқ. Суретшілер тек өзіндік көзқарасы мен кез келген шабыт тудырған объектісі туралы түрліше көріп, сезінуі және өнер арқылы сөйлете алуымен ғана ерекшеленеді. Бүгін Ұлттық музейде ашылған «Суретке салынған уақыт» көрмесі түбі бір түркі жұртынан таралған қазақ және мажар ұлттарының өнераралық байланысын суреттейд», деді А.Сыдықов.
Өз кезегінде Мажарстанның Қазақстан Республикасындағы Төтенше және өкілетті елшісі Отто Иван Рона алғысын білдіре отыра, көрменің маңыздылығын атап өтті.
«Қазіргі таңда Қазақстан мен Мажарстан арасында мәдени-гуманитарлық және басқа да салалар бойынша тығыз ынтымақтастық қатынастар тұрақты дамып келеді. Бүгінгі көрме де соның жарқын көрінісі. Өзім өнертанушы болмасам да, суретші әр детальға назар аударту арқылы тұтастай бір бейнені көз алдыңа елестетеді. Иллюзияға толы туындылар көрермендердің көңілінен шығады деген ойдамын», деді Отто Иван Рона.
Аталған көрмеде «Жасырылған бейнелер», «Айналар мен шағылулары», «Бос» сынды туындылар топтамасы қойылды. Суретші шығармашылығында ерекше орын алатын даңқты анаморфозалар да көрме қонақтарының назарына ұсынылды. Бұл – абстрактылы туындылар, олардың шынайы мағынасын тек қос мағыналы сурет төңірегінде тікелей орнатылған арнайы құрылғылардың – конустық немесе цилиндрлік айналардың көмегімен тамашалайды.
Айта кетейік, Иштван Орос дәстүрлі сурет салу техникасында бейнеленген визуалды парадокстарды және кеңістіктік елестерді пайдалана отырып, күрделі оптикалық иллюзиялар жасайды. 1984 жылдан бастап суретші грек тілінен аударғанда «ешкім» мағынасын білдіретін «Утис» (Utisz) лақап атын қолданады.
Классикалық бейнелеу өнері мектебінің шәкірті бола отырып, Иштван Орос ғасырлар бойы қалыптасқан көркемдік дәстүрлерді, сондай-ақ батыл жаңашыл идеяларды біріктіретін, өзіндік ерекше, қайталанбас стиль жасағанын байқаймыз.
Іс-шараға дипломатиялық қоғамдастық өкілдері, қоғам қайраткерлері мен суретшілер, зиялы қауым өкілдері қатысты.