Өнерде шекара жоқ. Музыка да солай. Ұлтқа, тілге, дінге, ұстанымдар мен көзқарастарға бөлінбейді – тек талантты таңдайды. Адам да талғамайды. Жақсы әуенге тек жүрек керек. Нәзік сезімдердің нотаға түсіп, әуелей аспанға көтерілгенін тек есту керек. Жан-дүниеңді еліткен сол әуез жоғарылаған сайын өзің де бір толқып, бір түсіп, бір суып, бір ысып отырасың. Музыканың құдіреті де осы.
Астаналықтар әуезді ән тыңдап, өнерден эстетикалық ләззат алу үшін көбінесе Е.Рахмадиев атындағы Мемлекеттік академиялық филармонияға барып жатады. Әсіресе, филармония солисі Саида Қалықованың көрермені көп деседі. Әлқисса. Музыкант, сазгер Саида Қалықова аталған өнер ұжымында көптен бері еңбек етеді. «Болашақ» халықаралық бағдарламасымен оқыған ол Флоренция (Италия) қаласындағы Conservatorio Luigi Cherubini университетінде магистратураны үздік дипломмен тәмамдаған. Сондай-ақ Д.Д.Шостакович атындағы Санкт-Петербург қаласындағы академиялық филармониясының да белді өнерпазы. Саида тыңдаушысын өзінің ерекше талантымен һәм фортепиано аспабында асқан орындаушылық шеберлігімен таңқалдырып, «Қазақстанның 100 жаңа есімі» жобасына енді. Зағип сазгердің талабы мен талантына көз алдындағы тас түнек ешқашан кедергі болған емес.
«Мен бала кезімнен музыкаға әуеспін. Алты жасымда ата-анама ештеңе айтпастан, өз бетіммен музыка педагогына жазылдым. Ауыр дерттің салдарынан қос жанарым көруден қалса да, музыкамен айналысуды жалғастырдым. Нотаны көзбен емес, жүрекпен жаттадым. Әуен мен әуез – менің өмірім. Соның арқасында жаңа белестерді бағындырып, түрлі концерттік алаңдарда өнер көрсетіп жүрмін», дейді Саида Қалықова.
Ол алғашқы шығармасын 15 жасында жазған. «Жаңбырдан кейін» композициясы ақ жауыннан кейінгі табиғаттың тамашасын әндетеді.
Айта кетейік, бүгінде сазгер 20-ға жуық музыкалық шығармалардың авторы, 100-ден астам классикалық музыканың үздік шығармаларын жатқа орындайды. Қазақстанда ғана емес, Ресейде, Италияда, Түркия мен Румынияда ондаған концерт өткізді.
Одан бөлек Саида Қалықова халықаралық байқауларға қатысып, қайырымдылық іс-шараларына да жиі атсалысады. Ал шығармашылықта репертуарын үнемі жаңартып отыруға тырысады.
Еске салсақ, музыканттың елордалық мемлекеттік филармония сахнасында шығармашылық жолының жиырма жылдығына арналған концерті өтті. Ендігі мақсат – Лондондағы Альберт-холл, Монакодағы филармония сахнасы. Талантты сазгердің арманына тілекшіміз.