Тарихта мәдениеттің жалпыадамзаттық қазынасына елеулі үлес қосқан әйел суретшілер аз емес. Шығармашыл ханымдардың өз қолтаңбасы арқылы әлемге айтары бар. Ә.Қастеев атындағы өнер музейінде «Таң-Шолпан» халықаралық тәуелсіз әйел суретшілер қорының «Толғаныстар» атты көрмесі ашылды.
«Таң-Шолпан» халықаралық тәуелсіз әйел суретшілер қоры Қазақстан мен алыс-жақын шетелдердің кәсіби шеберлерін біріктірген бірегей өнер алаңы. Оған мүше нәзік жандылардың есімдері республикалық және халықаралық көрмелерден белгілі. Жобаның негізін қалаушы – Қазақстан және Еуразиялық Суретшілер Одағының мүшесі, суретші-кескіндемеші Жәмила Такеннің айтуынша, қордың мақсаты – суретші әйелдің шығармашылық әлеуетін ашу, оның тұлғалық, шығармашылық және рухани өсуіне жағдай жасау. Өнер алаңының атауы да таңның атысымен, таңғы жұлдызбен, қайта жаңғырумен және әйелдің жасампаз қуатымен байланыстырылған.
Көрмеде ұсынылған шығармаларда қазіргі өмірдің шындығын көрсететін әлеуметтік тақырыптағы тұжырымдамалық жұмыстардан басқа, философиялық ойлар, дерексіз кескіндеме бар. Бұл көркем шығармаларда, гобелендерде және киізден жасалған паннода бейнеленген ұлттық тақырыптарды құрайды. Графика, сонымен қатар акварель мәнерімен ұсынылған өнер туындылары ой тереңдігімен, үйлесімді колористикалық комбинациясымен ерекшеленеді.
– «Толғаныстар» – тұжырымдамалық көрме. Қазір күрделі, геосаяси оқиғалар кезеңі. Адамдар, әсіресе еліміздегі қаңтар оқиғасынан және Украинадағы жағдайдан кейін болашаққа алаңдаушылықпен қарай бастады. Өкінішке қарай, көпбалалы аналар проблемасы, жастар арасында суицидтің өсуі және т.б. жағдайлар орын алуда. Біз сырттай бақылаушы бола алмаймыз және өз шығармаларымызда болып жатқан оқиғалардың мәнін жеткізуге тырысамыз, ал жеткізе алдық па, жоқ па – оны көрермендеріміз бағалайды... Суретші – халықтың үні, айналада болып жатқан барлық жағдайға сезімтал. Табиғатты, қоршаған әлемді нәзік сезінеді. Біздің ұлы дала шексіз көкжиек пен ашық аспанның көгілдір тұңғиығымен ұштасқан бұл әлем – біз өмір сүргіміз, сүйгіміз келетін дүние. Біз өз шығармашылығымызды адамдарға көрсеткіміз келеді, әлемдегі өркендеу мен мәдени-рухани жаңғыруды қолдаймыз, өйткені біздің қорымыз «халықаралық» мәртебені бекер иеленбеген. Қордың феминистік идеяларға ешқандай қатысы жоқ! Бізді өнерге деген сүйіспеншілік, сұлулықты жасауға деген ұмтылыс біріктіреді. Біздің әрқайсымыздың өз көзқарасымыз бен өзіндік ерекшелігіміз бар, бірақ ынтымақтастық процесінде біз одан да көп нәрсеге қол жеткіземіз, – дейді «Таң-Шолпан» қорының жетекшісі, суретші Жәмила Тәкен.
Әр жаңа көрмеде суретшілер тың туындылар жасауға тырысады. Әр көрменің өз тақырыбы мен идеяларды жүзеге асыру уақыты бар. Айталық, осы жылдың наурыз айында елордадағы Ұлттық музейде ашылған «Тікенектер арқылы...» көрмесі Қазақстанның халық ақыны Мәриям Хакімжанованы еске алуға арналған. Заманауи әлем туралы ой жүгірте отырып, Қор суретшілері екі перфоманс жасады. Олардың тақырыптары цифрлық технологиялар – «QR-сod дала» және геосаяси «Алақандағы аспан». Суретшілер әлемді тазалыққа, ізгілікке, үндейді. Олардың бәрін өнерге іңкәр еткен мейірім шұғыласы. Көрмеде көрермендер үшін бейне форматтағы қойылымдар да ұсынылған. Белгілі өнертанушы Наталья Баженова жетекшілік ететін өнер жәрмеңкесі қыркүйек айының 10-на дейін жалғасады.
АЛМАТЫ