Атақты шахматшы, «Уфимцев қорғанысының» авторы Анатолий Уфимцевтің туғанына биыл 100 жыл толды. Оның құрметіне Қостанай қаласының орталығындағы Шахмат клубының қабырғасына ескерткіш тақта ілінді. Бұл туралы egemen.kz тілшісі хабарлады.
Тақтада «Осы шахмат клубында ХХ ғасырдың 1987-2000 жылдары аралығында көрнекті шахмат теоретигі, Қостанай қаласының құрметті азаматы Анатолий Гаврилович Уфимцев өз тәжірибесін ортаға салды. 11.05.1914—02.07.2000» деп жазылған жазу бар.
Ескерткіш тақтаның пердесін сыпыру құрметіне облыс әкімі Нұралы Сәдуақасов пен соғыс және спорт ардагері Мағауия Юнусов ие болды.
Атақты шахматшы Анатолий Уфимцев Қазақстанның 11 мәрте чемпионы болған. Сонымен қатар атақты гроссмейстерлер Петросянмен, Спасскиймен шаршы тақтада күш сынасқан. Оларды жеңген кездері де болған. Оның артында «Уфимцев қорғанысы» атты керемет теория қалды. Бұл теория кейінгі жылдары «Пирц-Уфимцев қорғанысы» деп те айтылып жүр.
Қостанайда биыл шахмат теоретигінің 100 жылдығына орай бірнеше шахмат жарыстары өтеді.
Нәзира Жәрімбетова.
Дереккөз: egemen.kz.
Фото: vesti.kz.