Кеше тарихтағы ең күшті тайфундардың бірі Жапонияның оңтүстік бөлігінде басталды, деп хабарлайды Egemen.kz BBC News-ке сілтеме жасап.
Кеше кешкі уақытта Кагосима қаласы маңындағы Кюсю аралында «Нанмадол» тайфуны басталды.
Тайфун аймағындағы желдің екпіні сағатына 234 км-ге дейін жетеді. Жапон метеорологиялық қызметінің мәліметінше, кей жерлерде шамамен 500 мм жауын-шашын түскен. Бұрын-соңды болмаған мұндай нөсер жауын су тасқыны, сел және көшкінге қауіп төндіріп отыр.
Билік 4 миллионға жуық адамды қауіпсіз жерлерге көшіруге шақырды. Кюсюге қатынайтын пойыздар, паромдар мен рейстер тоқтатылды. Тайфун салдарынан 200 мыңға жуық үй жарықсыз қалды.
Жапония премьер-министрі Фумио Кисида адамдарды кез-келген қауіпті аймақтардан тез арада эвакуациялауға шақырған арнайы мәлімдеме жасады.
«Түнде эвакуациялау өте қауіпті. Күн батқанға дейін қауіпсіз жерлерге эвакуациялауға шақырамын», делінген хабарламада.