Елорданың Е.Рахмадиев атындағы Мемлекеттік академиялық филармониясында «Франция музыка кеші» концерті өтті. Кеш бағдарламасында Жорж Бизе, Морис Равель, Клод Дебюсси, Шарль Гуно, Жюль Массне, Шарль Кеклен, Эдуар Лало және Франсис Пуленк сынды француз композиторларының танымал вокалдық шығармалары орындалды.
Жалпы, француз мәдениетінің әлемдік өркениеттегі алар орны ерек. Ал француз әні – тарихы терең музыкалық мәдениеттің бірі. Мәселен, Францияның ұлттық операсы XVII ғасырдың ортасында қалыптасып, содан бері әлемдік музыка қазынасына сандаған жауһар сыйлады.
Кеш барысында Қазақстанның еңбек сіңірген қайраткерлері Бибігүл Жанұзақ (сопрано), Азамат Жылтыркөзов (баритон), Музыка академигі Саида Калыкова (фортепиано), «Дарын» мемлекеттік жастар сыйлығының лауреаты Алтынбек Әбілда (баритон), халықаралық байқаулардың лауреаттары Әйгерім Аманжолова (сопрано), Талғат Аллабиринов (тенор), Алтынбек Арыстанбек (тенор), Фируза Рахметова (сопрано) өнер көрсетті. Ал концертмейстер – Роза Шотқалиева. Азамат Жылтыркөзов француз музыкасының кешін дайындауға көп күш жұмсалғанын атап өтті.
«Бағдарлама француз музыкасының сұлулығы мен байлығын көрсету үшін арнайы таңдалды. Бизенің «Кармені» баршаға таныс, ол әлі күнге дейін миллиондаған адамның сүйікті операсы саналады. Концертте, сондай-ақ түрлі көңіл күйді, нәзік психологиялық күйлерді жеткізу ерекше маңызды болған импрессионистер Равел мен Дебюссидің туындылары болды. Одан бөлек, көрермен лирикалық және құштарлық әуендерінің авторы «әйел атаулысының ақыны» Массненің де шығармаларын тыңдады. Ал Пуленктің музыкасында Париждік бояу ерекше естіледі. Яғни француз шансонымен байланысы бар», дейді өнерпаз.