Текелінің темір зауыты

Мұнда бірінші кезеңде 100 жаңа жұмыс орны ашылды. Алдағы уақытта жұмысшылар санын 500-ге дейін ұлғайту көзделген. Тартылған инвестиция көлемі 4 млрд теңгеден асады. Экспортқа бағытталған кәсіпорынның салтанатты ашылуына Жетісу облысының әкімі Бейбіт Исабаев, «Горное бюро» ЖШС компаниялар тобының директоры Абдраман Еділбаев, зауыт жұмысшылары мен текелілік тұрғындар қатысты. Текелі тұрғындарын кәсіпорынның ресми ашылуымен құттықтаған өңір басшысы жыл басынан бері облыс экономикасына 129 млрд теңге инвестиция тартылып, 15 жоба іске асырылғанын атап өтті. Солардың бірі – Текеліде ашылып отырған «Электромарганец» ЖШС. Бұл – металлургия саласындағы ғылыми жетістіктерді өндіріске енгізіп отырған айтулы нысан.

«Электромарганец» ЖШС-нің темірді тікелей қайта қалпына келтіретін зауыты Текелі қаласының ғана емес, облыстың әлеуметтік-экономикалық дамуына жаңа серпін береді деп ойлаймын. Өндірістің экологиялық жетістігі – ғылыми ізденістер мен заманауи техно­логияны қабыстырудың қандай табыс­қа жеткізетінінің айқын айғағы. Ел Пре­зи­дентінің алдымызға қойған басты мін­деттерінің бірі де осы. Бұл алғашқы қар­лығашы десек те болады. Кәсіп­орын­ның болашағы зор, жоспа­ры ауқымды. Алда жұмыс орнын бұдан әрі көбейтіп, кәсіпорынның қуатын арттыра түсу межеленіп отыр. Осыған орай жергілікті оқу орындары­на технологтар даярлау, өңірдегі кол­ледж­дерде салаға қажетті жаңа маман­дықтар ашу мәселесінің де өзекті екенін айту керек. Сондықтан біз жаңа кәсіп­орындарды заманауи, жоғары технологиялы құрал-жабдықтармен жұмыс істей алатын, бәсекеге қабілетті мамандармен қамтамасыз етуіміз керек», деді Б.Исабаев.

Өз кезегінде «Горное бюро» ЖШС компаниялар тобының директоры, техника ғылымдарының докторы Абдраман Еділбаев кәсіпорынның ерекшеліктеріне тоқталды. Оның айтуынша, кәсіпорындағы тәжірибелік-өнеркәсіптік қондырғылар әлемдік өнеркәсіптің жаңа талаптарына сай. Зауытта экологиялық таза өндіріске көшуге серпін беретін, темірді тікелей қалпына келтіретін технология енгізіл­ген. Өндірісте отандық концентраттар, кен мен көмір қолданылады, ал өнді­ріл­ген өнімге сұраныс жоғары. Қазір Еуропа, Қытай, Түркия, Ресей елдері­мен келісім жүріп жатыр. Мұндай өнім әлем­дік нарыққа тұңғыш рет шығарылмақ. Сондықтан нарықтағы өз орнын бекітіп, маркасын таныту аса қажет іс. Жаһандық бәсекелестіктегі ең маңыздысы – сапа, сондықтан, өндіріс барысында сапаға ерекше екпін түсіріледі.

«Алдағы уақытта қолданылып отыр­ған технологиямызды одан әрі дамы­ту­ға, тұрақты жұмыс орындарын ұлғайта отырып, қуаттылығы жоғары тәжірибелік-өнеркәсіптік қондырғылардың қолданыс аясын кеңейтуге, осылайша Текелінің, жалпы отандық металлургияның елдің әлеуметтік-экономикалық дамуына өз үлесін қосуына атсалысуға ниеттіміз. Жалпы, әлемде домендік өндіріс технологиясын қолданатын шамамен 3 500 кәсіпорын және темірді тікелей қалпына келтіру технологиясын қолданатын 30-дай кәсіпорын бар екенін атап өт­кім келеді. Енді бұл технология, міне, біздің елімізде де енгізіліп отыр», деді А.Еділбаев.

Сол сияқты ол тікелей қалпына келтіру мен домендік өндіріс бір-бірімен жақсы үйлесетінін айтты. Бұл тұрақты іске қосылғаннан кейін Текелі тау-кен өңдеу кешенімен өзара бірлесіп жұмыс істеуге, сондай-ақ оны шикізатпен қам­тамасыз ету жағынан жақсы мүмкін­діктерге жол ашпақ.

Кадр даярлау мәселесіне келсек, кәсіпорын басшылығы Ресейдің Иркутск облысындағы осындай кәсіпорынның мамандарын тарта отырып, бірнеше ай бойы зауыт қызметкерлерін оқытқан, техминимум, өндірістегі қауіпсіздік бойынша, жаңа технологияны қолдану негіздері мен мүмкіндіктері жөнінде дәрістер ұйымдастырған.

Зауыттың салтанатты ашылуында іске қосудың символдық нүктесі басы­лып, келушілер зауыттың ішкі жұмы­сымен танысты.

Атап өтсек, моноқалада құрылыс материалдары (құрылысқа арналған құрғақ қоспалар, жиектас, бетон бұйымдар), ашытқы, таурит, сүт өнімдері және басқа да тауарлар өндіріледі.

Жетісу облысы,

Текелі қаласы