Қырғызстан 2023-2025 жылдарға БҰҰ Адам құқықтары жөніндегі кеңесінің мүшесі болып сайланды, деп хабарлайды Egemen.kz.
Елдің сыртқы істер министрлігі баспасөз қызметінің хабарлауынша, сайлауда БҰҰ-ға мүше 126 мемлекет Қырғызстанды қолдаған. Азия-Тынық мұхиты аймағынан төрт орын үшін күреске алты мемлекет (Қырғызстан, Ауғанстан, Бангладеш, Вьетнам, Мальдив аралдары және Корея Республикасы) қатысты.
«Қырғыз Республикасының осындай беделді халықаралық органға кезекті сайлануы әлемдік қоғамдастықтың адам құқықтары саласындағы жетістіктерін және оның адам құқықтарын, негізгі бостандықтарды, демократиялық дамуды қорғау және ілгерілету жөніндегі жаһандық науқанға қосатын болашақ үлесін мойындауы болып табылады», делінген Қырғыз Республикасының Сыртқы істер министрлігі хабарламасында.
Бұған дейін Қырғызстан 2009-2012 және 2016-2018 жылдары БҰҰ-ның адам құқықтары жөніндегі комитетінің мүшесі болған. Кеңес мүшелері үш жыл қызмет етеді және қатарынан екі өкілеттік мерзімінен кейін дереу қайта сайлануға құқығы жоқ. Кеңеске мүше болу адам құқықтары саласындағы жоғары стандарттарды сақтау үшін жауапкершілікті қамтиды.