Жас құтқарушылар мектебі

«Қайнар» білім беру және бос уақытты қамту кешеніне қарасты аула клубы негізінде өмірге келген қосымша мектеп – Екібастұз қаласы білім беру бөлімі және жергілікті төтенше жағдайлар бас­қармасының бірлескен жоба­сы. Мұнда балаларды оқыту, оларға мектепте алған теория­лық білімдерін кеңейтуге және нақтылауға, алғашқы кө­мек көрсету дағдыларын қалып­тас­­тыруға, төтенше жағ­дай­лар­да іс-әрекеттер туралы бі­лім алуға, іздестіру-құтқару жұ­мыс­тарының дағдыларын игеруге, психологиялық да­йын­дықтан өтуге мүмкіндік қарастырылған.

Кәсіптік бағдарлауға арналған ұйымға орта мектептердің 7-10-сынып оқушылары келеді. Жас құтқарушылар төтенше жа­ғ­дайлар басқармасымен әзір­ленген қауіпсіздік мәдениетін қалыптастыру бағдарламасы бо­­йынша білім көкжиектерін ке­ңейтіп, дәрістерді арнайы мамандар мен педагогтер жүргізеді. Оқу-жаттығу ор­талығы ма­ман­­­дандырылған жабдық­тар­­мен, оқу әдебиеттерімен және азаматтық қорғау бойынша әдіс­­темелік құралдармен жаб­дық­талған.

Орталықтың ашылуында «Ангренсор» ЖШС «Жас құ­т­қарушылар» жасағына форма жиынтығын сыйға тартты.

– Балалар жылында қол­ға алынған жобаның ма­ңызы зор. Көптеген жоғары сы­­нып оқушылары белсенді өмір салтын ұстанады, спортпен шұ­ғылданады. Біз жастарға тө­тенше жағдайда алғашқы көмек көрсету мүмкіндігін ұсы­на оты­рып, әлеуметтік ма­­ңызы бар салада өздерін та­нытуға жағ­­дай тудырамыз. Патрио­тизм­­ді, жауапкершілікті, бел­сенді қоғамдық ұстанымды қалыптастыруға ықпал етеміз, – деді облыстық төтенше жағ­дай­лар департаментінің басшысы, генерал-майор Жасұлан Жұ­машев мектептің ашылу салтанатында.

Айта кетелік, бүгінде Екібас­тұз қаласында 8 аула клубы бар, олар жалпы саны 2 мыңнан астам баланы қамтып отыр. «Жан­ұя» отбасылық клубы, жас шаштараздар мектебі, аспаздық клуб, балалар велотуризмі және «Жас құтқарушылар» орталығы жергілікті жасөспірімдер үшін аса танымал. Ал жыл соңына дейін шаһарда ұлттық ойындар мектебін ашу жоспарда тұр.

Павлодар облысы,

Екібастұз қаласы