Республика күні қарсаңында Жетісу облысында бірқатар әлеуметтік маңызы бар нысан ел игілігіне берілді. Бұлардың қатарында спорт алаңы мен халыққа мемлекеттік қызмет көрсетудің цифрлық кеңсесі және бес медициналық орталық бар. Осының нәтижесінде 4 мыңнан астам ауыл тұрғыны сапалы медициналық қызметпен қамтылды.
Әуелі мерекенің шымылдығы Көксу ауданына қарасты З.Тамшыбаева ауылында түрілді. Шаңырақтарына көптен күткен көгілдір отынның келуі тұрғындардың көңілін шат-шадыман етті. Табиғи газға 400-ге жуық отбасы қол жеткізді.
Одан кейін Ескелді ауданында 1 900-ге жуық адам тұратын Абай, Теректі және Қоржымбай ауылдарында үш блок-модульдік медициналық пункт ашылды. Үш нысанның жалпы құны 105 млн теңгені құрайды. Әр фельдшерлік пунктте акушер-гинекологтер мен фельдшерлер тұрақты жұмыс істейтін болады. Облыс орталығынан мамандардың келуі де ұйымдастырылмақ.
Аталған құрылыс нысанына отандық өндірістен металл конструкциялар мен сэндвич-панельдер пайдаланылған. Ішінде ыстық су, әжетханасы бар. Ғимараттар қайта жөндеуді қажет етпейді. Мамандар 30 жылдан 50 жылға дейін кепілдік беріп отыр. Міне, осылайша, блок-модульдік фельдшерлік пункттер ауыл тұрғындарына медициналық қызметтің қолжетімділігі мен сапасын арттыру мәселесін қысқа мерзімде шешуге мүмкіндік бермек. Бұл ғимараттар құрылыстың жылдамдығы ғана емес, сапасымен де ерекшеленеді. Сонымен қатар жобалық-сметалық құжаттар әзірлеуді қажет етпейді.
Осындай әлеуметтік нысан Алакөл ауданына қарасты Еңбекші ауылында да бой көтерді. Бір мыңнан астам халқы бар елді мекенге модульді дәрігерлік амбулатория ауадай қажет болатын. Қарапайым халық бір жасап қалды. Заманауи құрал-жабдықтармен жабдықталған денсаулық сақтау нысанының жалпы құны 78 млн теңгені құрайды. Ғимараттың жалпы ауданы – 110 шаршы метр. Ғимарат бір қабаттан, жеті бөлмеден тұрады. Дәрігерлік амбулатория 8 адамды жұмыспен қамтиды. Сондай-ақ Көксу ауданында да 1 500-ден астам адам тұратын Жамбыл ауылы халқының игілігіне фельдшерлік-акушерлік пункт пайдалануға берілді.
Одан бөлек Сарқан қаласында заманауи спорт нысаны ашылды. Ақын Сара атындағы орта мектептің стадионы қолданысқа берілді. Оның құрылысына жергілікті бюджеттен 59 млн теңге жұмсалған. Жыл соңына дейін Сарқан ауданында барлығы 4 футбол стадионы, 8 балалар ойын алаңы және 5 воркаут-алаң іске қосылмақ. Мерекеге орай ауданда енгізілген тағы бір нысан – «цифрлық кеңсе» бөлімшесі болды. Бұл кеңсеге күніне 100-ге жуық адам бара алады.
Қуаныштың үлкені Үштөбе қаласында болды. Ұлттық мерекеге орай 30 пәтерлі баспананың кілті табысталды. Салтанатты іс-шараға аудан әкімі Ерлан Исабеков, Үштөбе қаласының тұрғындары және мердігер мекеме өкілдері қатысты. Тұрғын үй «Нұрлы жер» мемлекеттік бағдарламасы аясында салынған. Үй құрылысына 405,6 млн теңге жұмсалған. Жаңа үйде 2 бөлмелі 10 пәтер және 3 бөлмелі 20 пәтер бар. Қоныс той иелері қатарында 20 пәтерге – 1 және 2-топтағы мүгедектер, Ауған соғысының ардагерлері, толық емес отбасылар, зейнеткерлер, мүгедек балаларды тәрбиелеп отырған отбасылар санатындағы азаматтар ие болды. Сонымен қатар 5 пәтер жетім балаларға, 5 пәтер көпбалалы отбасыларға бұйырды. Аудан басшысы тұрғындарды қоныс тойымен құттықтап, ауданда жақын арада 40 пәтерлі коммуналдық үйдің құрылысын бастау, сондай-ақ «Көкдала» шағын ауданында 20 жаңа тұрғын үй салу жоспарланып отырғанын қуанышпен жеткізді.
Жетісу облысы