М.С.Нәрікбаев атындағы Қазақ заң университетінде «Дарындарды басқару – HR студенттерінің бірінші форумы» өтті. Форумға еліміздің 12 университетінен 70-ке жуық болашақ HR мамандары қатысты. Аталған іс-шара Қазақстанның HR қауымдастығымен бірлесе отырып, еліміздің жоғары оқу орындарындағы HR студенттеріне ерекше назар аудару, оларға беріліп жатқан білім сапасын саралау мақсатында ұйымдастырылды.
Форумға Президент Әкімшілігінің Мемлекеттік басқару бөлімінің меңгерушісі Әлтайыр Ахметов, Ғылым және жоғары білім министрі Саясат Нұрбек, HR менеджерлері қауымдастығының Жалпы жиналысының төрағасы Әлихан Байменов, Еңбек және халықты әлеуметтік қорғау вице-министрі Олжас Ордабаев, университеттің басқарма төрағасы Талғат Нәрікбаев және басқа да танымал қоғам қайраткерлері, HR менеджерлер мен инфлюенсерлер қатысты.
«Шешімнің жолы – маманда. Джин Коллинз өзінің «Жақсыдан ұлыға» атты еңбегінде барлық мәселені мықты кадр шешетінін атап өткен болатын. Біздің университеттің басты мақсаты – халыққа қызмет ету. Сол себепті қоғамға керек тұлғаларды даярлаймыз. Өйткені әрбір диплом алған түлекке жауаптымыз», деді Т.Нәрікбаев.
Маман даярлауға қатысты маңызды мәслихатта HR-дың жоғары оқу орындарындағы оң өзгерістерді басқарудағы рөлі, қазіргі HR студенттердің еліміздегі корпоративтік басқару мәдениетін дамытудағы әлеуеті төңірегіндегі өзекті мәселелер талқыланды.
«Адами капиталдың даму деңгейі – әлеуметтің даму индикаторы. XXI ғасыр – түрлі биотехнология, инфокоммуникация заманы. Бірақ осының бәрі адам үшін, адам жасайды. Адамзат технологиялық даму сатысы жоғарылаған сайын адами капитал құндылығы да нығая түседі. Сол себептен ортамызға келіп отырған студенттер – болашақ HR мамандардың сапасы маңызды. Форумға қатысып отырған білім алушыларға 500-ден астам кәсіби маман кіретін HR менеджерлері қауымдастығына бір жылдық мүшелігін тегін ұсынуды құп көріп отырмыз», деді Ә.Байменов.
Барлық оң өзгерістің негізі – адам капиталы. Ал сол активтi құнды ететін, үздіксіз дамытатын қазақстандық жоғары білім ошақтарында HR мамандарының дайындығы, HR оқу бағдарламалары сапасы, заманауи үдерiс-талаптарға сәйкестігі, өндiрiс-әлеуеттi жұмыс берушілермен байланыс тетіктері, университеттердің окытушы-қызметкерлерін кәсіби дамуға ынталандыратын HR стратегиясы өте өзекті.
«Университеттердің HR командалары оң өзгерістерді қамтамасыз етуде маңызды тетік екенін бәріміз мойындаймыз. Оқытушылар, ғалымдар, әкімшілік қызметкерлер – барлығы университет миссиясы мен стратегиясын, мемлекеттік саясат тұрғысынан жоғары білім мен ғылым алдындағы басты мақсаттарды жетік түсініп, сапалы білім беру үшін де HR менеджменті ынталандырудың, мотивациялаудың заманауи ерекшеліктері мен үдерістерінен хабардар болуы уақыт талабы. Мықты HR-ы бар ұйым қай кезде де алдыңғы шепте болмақ. Осы форумның қорытындылары міндетті түрде бұқараға жеткізіліп, мамандардың күнделікті жұмысында қолданылады. Осындай уақтылы әрі өзекті бастаманы алға тартып, HR студенттерінің бірінші форумын ұйымдастырған оқу орнына алғыс айтамын», деді Ғылым және жоғары білім министрі Саясат Нұрбек.