Президент Қасым-Жомарт Тоқаевты ұлықтау рәсіміне 3 мыңға жуық адам ел өңірлерінен келіп қатысты. Бұл өте маңызды, өйткені адамның шені мен шекпеніне қарай бөлу болған жоқ. Қарапайым адам ұлықтау рәсімінің қалай өтетініне куә болды. Ешқандай пафоссыз-ақ бұл рәсімнің динамикасы жоғары, демократиялық қарым-қатынасқа негізделген.
Президенттің сөйлеген сөзі әсерлі болды, қатысушылардың барлығын, экран сыртында қарап отырған халықты толғандырды деп санаймын. Қасым-Жомарт Тоқаев елді толғандырған негізгі мәселені дөп басып айтты. Сайлауалды бағдарламасында көрсетілген басымдықтардың барлығы міндетті түрде орындалатынын сеніммен жеткізді. Әсіресе сыртқа кеткен қаржының қайтарылатынын, осыған байланысты үлкен жұмыс атқарылатыны көптің көңілінен шықты. Өйткені ол – халық қаржысы.
Өткен ұлықтаулармен салыстырар болсақ, бұл жолғы салтанатты іс-шара өте қарапайым, демократиялық сипатта өтті, сондай-ақ қарапайым халық өкілдерінің шақырылғаны қуантты. Президенттің ұстанымы секілді мәдениетті, шынайы, көпсөзділіктен гөрі іске негізделген кездесу болды. Ант қабылдау сәті де ерекше толқытты. Рәсімнен соң барлығымыз бір-бірімізбен пікір алмасуға да уақыт таптық. Қатысушылар ерекше әсерде, көңіл күйде болғанын көрдім. Ең бастысы, еліміз тыныш болып, Мемлекет басшысының алға қойған мақсаттары, халық алдындағы уәделері орындалатын күн бұйырсын деймін.
Белла ГАЗДИЕВА,
Ұлттық құрылтай мүшесі,
Президент жанындағы мемлекеттік басқару академиясы Ақмола облысы филиалының директоры