Ауыр атлетикадан Колумбияның астанасы – Богота қаласында өтіп жатқан әлем чемпионатында Қазақстан құрама командасының қоржынына тағы бір медаль түсті.
96 кило салмақта күш сынасқан Нұрғиса Әділетұлы бұған дейін жастар арасындағы құрлықтық деңгейдегі жарыстарда дараланып жүрген. Осыдан екі жыл бұрын ол Ташкентте ұйымдастырылған Азия біріншілігінде бас жүлдені олжалаған еді. Сол бәсекеде қандасымыз басты бәсекелесі Оңтүстік Кореяның өкілі Ёнг Хуннан 36 кило артық салмақты еңсеріп, барша жанкүйердің қошеметіне бөленді. Былтыр Нұрғиса ересектер дуына алғаш рет қосылғанына қарамастан Сары құрлықтың басты додасында күміс медаль иеленді. Міне, енді ол әлем чемпионатының күміс жүлдегері атанып отыр. Боготада қазақ зілтеміршісі қоссайыста 383 (174+209) кило салмақты көтерді. Бұл жарыстың бас жүлдесін бахрейндік Лесман Паредес жеңіп алды. Оның көрсеткіші – 397 (185+212) кило. Қола медаль колумбиялық Йор Мореноға бұйырды.
Осы салмақта тағы бір қазақ ауыр атлеті өнер көрсеткен еді. Бірақ Әлішер Сейітқазының қадамы сәтті болмай, 351 (160+191) килолық нәтижемен ол 11-орынды қанағат тұтты.