Қ.Сыдиықов атындағы Маңғыстау облыстық әмбебап кітапханасы арнаулы бөлімінің әлеуметтік қызметкері Саида Құсайынованың балаларға арнап брайль жүйесінде дайындаған ертегі кітапшалары көру қабілеті төмен жас оқырмандарға жаңа жылдық сый болды.
Бұған дейін барлығы 8 кітапша дайындап шыққан Саида – Орал қаласындағы зағип және нашар көретін балаларға арналған мектептің түлегі. Биыл 30 жасқа толған ол өз еңбектерін оқушылардың қызығушылығына қарай орындайды, мысалы зағип балаларды қуанту үшін ол бес ертегі кітапшасымен бірге, Түрік қағанаты мен Моцарттың өмірбаяны кітапшасын және бір көрнекі құрал құрастырып ұсынды.
– Балалар жаңа жылға сыйлықтар күтеді. Мен де олардың көңіл күйін көтеруге тырыстым. Балаларға арналған бұл кітапшалар қол моторикасын дамытып, олардың оқуға қызығушылығын арттырады деп сенемін дейді, – Саида Құсайынова.
2019 жылдан бері кітапхананың арнаулы бөлімінде брайльдан қосымша сабақ жүргізетін Саида зағип балаларға қуаныш сыйлаумен қатар, олардың рухани көкжиегін кеңейтетін басқа да тың жобаларды қолға алмақ.
Маңғыстау облысы