Coursera қазақстандық студенттерге де қолжетімді болады

«АҚШ-қа жұмыс сапарым барысында бүгін Coursera өкілі Jeff Maggioncalda мырзамен кездесіп, ортақ жобамыз бойынша сұрақтарды талқыладық. Бұл жоба Қазақстан Президентінің 2022 жылғы қыркүйекте Нью-Йоркке сапары кезінде іске қосылған еді. Кездесу барысында екі жаққа да тиімді уағдаластыққа қол жеткізілді. Келісім бойынша бағдарламаның бірінші кезеңі осы айда басталады. Coursera курстары 25 өңірлік университеттегі 20 000 қазақстандық студентке қолжетімді болады», деп жазды Саясат Нұрбек өзінің Facebook парақшасында.   Қазіргі уақытта жаһандық білім беру платформасының 50 басым курсы қазақ және орыс тілдерінде қолжетімді, олар бағдарламалау және цифрландыру, математика, физика, маркетинг және басқа да салаларды қамтиды. Басым курстардың тізіміне АҚШ, Еуропа және Азияның жетекші университеттерінің бағдарламалары кіретінін атап өту керек.

Министр ведомство командасы бағдарламаны қазақ тіліне локализациялай отырып, 600 курсқа дейін кеңейту бойынша жұмыс істеп жатқанын жеткізді. Алдағы үш жылда 100 000 қазақстандық студент пен өзге де пайдаланушылар Coursera платформасына қол жеткізе алады.

Ведомство басшысының айтуынша, қазірдің өзінде Stanford University-де оқитын қазақстандық студенттер платформаның барлық мүмкіндіктерін белсенді пайдаланып жатыр.

«Бүгінгі кездесуде олардың да пікірлерін сұрадым. Аталған платформа оқу жоспарларындағы олқылықтарды толтыруға және дипломдық бағдарламаларды еңбек нарығымен тікелей байланыстыруға көмектеседі. Іс жүзінде біздің студенттерге мансаптық мақсаттарына жетуге мүмкіндік береді. Coursera жобасы жұмыс берушілерге де пайдалы болмақ», деп түйіндеді Саясат Нұрбек.