Ескілікті естелік ретінде сақтап қалу үшін суретші әрі журналист Руслан Шақабаев Семейдің көне ғимараттарын қарындашпен қағазға түсіріп жүрген еді. Стилі ерек, жанры бөлек суреттері жинақталған соң ол Достоевскийдің әдеби-мемориалдық музейінде «Терезелер» атты графикалық жеке көрмесін ашты.
Көрмедегі суреттерден Семейдің ХVІІІ-ХІХ ғасырларда бой көтерген жер үйлерін, ескі ғимараттарын көруге болады. Негізі қарт қала ғасырдан асқан үйлерімен, ғимараттарымен ерекше. Мұнда кешегі Алаш зиялыларының табы қалған жерлер қаншама? Соның бәрін қаз-қалпында бейнелеп жүрген Русланның еңбегі өте зор.
– Жыл сайын қала жаңарып келеді. Көне үйлер сүріліп, орнына сауда орындары секілді қызылды-жасылды ғимараттар көтеріліп жатыр. Өткен ғасырдағы үйлердің жоқ дегенде терезелері жаңартылады. Суретші болған соң қарт қаланы қаз-қалпында қағазға түсіріп, тарихта қалдырғым келеді, – дейді суретші Руслан Шақабаев.
«Терезелер» атты жеке шығармашылық көрмеге Руслан Шақабаев 58 жұмысын ұсынған. Айта кетерлігі, кейіпкеріміздің мамандығы суретші болғанымен, журналистика саласында қызмет етіп келе жатқанына 20 жылдан асты.
Суретшінің туындыларынан ескіліктің лебі байқалады. Бейне бір Семей шаһарын аралап жүргендей күйге түсесің. Оның үстіне, Руслан «Татар слабодасы» аталып кеткен қаланың көне ауданында тұрады. Соған қарап, қолына қарындашты қаланың рухын сезініп барып алған ба дерсің. Әйтпесе, көпшіліктің назарын аударатындай картиналар шықпас еді. Суретшінің айтуынша, ол әу баста үйлердің терезелерін сала бастаған. Адамның ішкі жан дүниесі көзінде болса, қаланың шынайы тіршілігі терезелердің арғы жағында. Әр терезеде әр- түрлі тағдыр, сан түрлі өмір.
СЕМЕЙ