Жаңа міндеттер жүктеген бағдарлама

Жиында республикалық қо­ғамдық бірлестік төрағасы Тө­леу­бек Мұқашев Мемлекет басшысының мәслихаттар алдына қойған «Жаңа Қа­зақстанның құрылысы», жер­гілікті халықтың өмір сүру жағдайы мен сапасын жақсарту жөніндегі жаңа міндеттемелері депутаттардың сайлаушылармен арадағы жұмы­сын қайта құру мен сайлаушылар тәртібі және мәслихатшыларды кері шақырып алу институттарын енгізуді іске асыратынын атап өтті.

– Жаңа жағдайда мәсли­хат­тар мен олардың депутат­тары­ның негізгі қызметі – өз ау­мағында сапалы әлеумет­тік инфрақұрылымды: балабақ­шаларды, абаттандыруды, сау­да нысандарын, жолдарды, кітапханаларды, мектептерді, тұрғын үйлер мен әлеуметтік нысандарды және т.б.салу мен жөндеуді ұйымдастырудан кө­рінбек. Мысалы, алдағы уа­қытта елімізде көптеген әлеу­меттік инфрақұрылым нысандары сай­лаушылардың талабы мен жер­гілікті мемлекеттік бағ­­дарла­малар негізінде құры­латын болады. Дегенмен бұл өзгерістердің барлығы мәсли­хат­шылардың белсенді азаматтарды тарта отырып тұрақты мониторинг пен бақылау жасау жауапкершілігін арттырады, – деді Т.Мұқашев.

Сондай-ақ қоғамдық бір­лес­тік төрғасы депутаттың жұмыс жағдайының жасалуы мәсе­лесіне тоқталды. Яғни мәслихат­шыларды үздіксіз оқы­ту және депутаттар қыз­ме­тінің өзге де түрлері тұжы­рым­дамасын сапалы іске асыру мәслихаттар та­рапынан бір­қатар ұйымдас­тырушылық шартты қамтама­сыз етуді қа­жет етеді. Депутат­тың қыз­ме­тін құқықтық, ұйым­дас­тырушылық жағынан, кәсіби­лігін қамтамасыз етуге жекелей тоқталған Т.Мұқашев: «Де­путаттың қызметін қаржылық қамтамасыз етудің мазмұны мынада: бұл депутат қызметінің (жұмысының) қысқаша сипаттамасы көрсетілген тізбесі, сон­дай-ақ бұл мәслихаттың жұ­мысы мен өкілеттіктерін жү­зеге асыру үшін мәслихат депутат­тары қызметінің барлық түрлеріне қажетті ақшалай шығындардың есебі болып табылады. Мысалы, Германияда бір жергілікті депутаттың үз­дік­­сіз оқуын ұйымдастыруға жергі­лікті бюджеттен жыл сайын 12 мың еуроға дейін бө­лінген, Мажарстан, Польша, Чехияда шамамен 4,5 мың еуро бөлінді, Оңтүстік Кореяда – 13 мың АҚШ долларына дейін, Ресейде 25 мың рубль шамасында бөлінген», деді. Сондай-ақ Т.Мұ­қа­шев депутаттарды былтыр Ақтөбеде қабылданған, жуырда Шымкентте алқаланған Үндеуді қолдауға шақырды.

Ал облыс әкімі аппаратының басшысы Еркеғали Әлімқұлов сайлауалды бағдарламаның екінші қағидаты – әділетті экономика құру ел экономи­касы­ның даму моделін түбегейлі өзгерту арқылы халықтың, биз­нестің және мемлекеттің мүд­десін бірдей қорғауға негіз­делетінін айта келе өңірде атқарылып жатқан жұмыстарға кеңінен тоқ­талды. Мысалы, тікелей шетелдік инвестиция­ларды тарту бойын­ша өңірде өткен жылдың ІІІ тоқсанының қорытындысы бойын­ша шетелдік инвестиция­лар көлемі 331,1 млн АҚШ долларын құ­рап, жоспар толығы­мен орын­далған. Өткен жыл­дың қоры­тындысымен 831 елді мекеннің 719-ы немесе 87,0%-ы ауыз сумен қамтамасыз етілді. Сондай-ақ тұрғын үй, білім, денсаулық салаларында атқарылған жұмыстарға тоқ­талған аппарат басшысы облыста сайлауалды бағдарламада көрсетілген межелер жоспар­ға сай іске асырылуда екенін мәлімдеді. Облыстық мәслихат­тың аграр­лық сала, жер қатынас­тары және табиғатты пайдалану мәселелері жөніндегі тұрақты комиссия төрағасы Нұралы Әбішов баяндамасында еліміз­дегі суармалы жерлердің 4-тен 1 бөлігі Түркістан облысына тиесілі екенін атап өтті.

– Ауыл шаруашылығы жалпы өнімінің 12 пайызы облысқа тиесілі, оның өнім көлемі 996,3 млрд теңгені құрайды. Ауыл шаруа­шылығының негізгі капиталына 59,8 млрд теңге, тамақ өндірісінің негізгі капиталына 7,2 млрд теңге инвестициялар тартылды. Ауыл шаруашылығы дақылдарының егіс алқаптары 859,9 мың гек­тарға орналастырылды, өткен жылдан 14,4 мың гектарға артт­ы. Жаңадан 101 гектарға жылыжайлар салынып, жалпы көлемі 1 569 гектарға жетті. Бұл республикалық көрсет­­кіштің 71 пайызын құрай­ды, – деді Н.Әбішов.

Жиын соңында Т.Мұқашев қоғамдық бірлестік атынан белсенді депутаттық қызметі және облыстың әлеуметтік-экономикалық дамуына қосқан елеулі үлесі үшін бірқатар облыстық мәслихат депутатын «Құрметті депутат» төс белгісімен және Грамотамен марапаттады.

Түркістан облысы