Шымкент қаласында 2018 жылы туған бала бассейнде суға батып кетті. Үлкендер баланы қараусыз қалдырған, деп хабарлайды Egemen.kz қалалық Төтенше жағдайлар департаментінің баспасөз қызметіне сілтеме жасап.
29 қаңтар күні сағат 17:25-те Шымкент қалалық Төтенше жағдайлар департаментінің басқару бөліміне жедел медициналық жәрдем қызметінен 2018 жылы туған ұл баланың балалар бассейніне батып кеткені туралы хабарлама келіп түскен.
Оқиға Тұран ауданындағы 8-шағын ауданда Үркімбаев көшесінің бойында, KASIET фитнес-клубында болған. Анықталғандай, балалар бассейнінде (тереңдігі 1 метр 20 сантиметр, ені 5 метр) шомылу кезінде ересектердің қарауынсыз қалған бала суға батып кеткен. Оқиғаның мән-жайы анықталып жатыр, тиісті сот-медициналық сараптама тағайындалды.
«Құрметті ата-аналар! Абай болыңыздар! Балаларды қараусыз қалдырмаңыздар! Балаларды бассейн ішінде өздерін дұрыс ұстауға үйретіңіздер», делінген Шымкент қалалық Төтенше жағдайлар департаментінің қоғаммен байланыс тобы таратқан хабарламада.