Елбасының Ұлы Жібек жолын жаңғыртуға байланысты берген тапсырмалары жүзеге асып жатыр. Кеше көрші Қытай елінің Гонконг қаласындағы арнайы әкімшілік ауданында «Қазақстан темір жолы» ҰК» АҚ еншілес компаниясы – «KTZ Express» коммерциялық құрылымының салтанатты ашылу рәсімі болды.
Ұлттық тасымалдаушының жаңа офисі Азиядағы жетекші орталықтың әлем елдерімен көліктік-логистикалық мақсаттағы қаржылық операциялар жасауына өкілеттілік ететін болады. Гонконгтегі бұл коммерциялық офис ұлттық компанияның көліктік-логистикалық хаб құрудағы, Ұлы Жібек жолын жаңғыртудағы, республиканың транзиттік әлеуетін арттырудағы тың қадамы болып отыр.
Коммерциялық құрылым Қазақстан аумағы арқылы экспорттық транзиттік жүктердің тұрақты өткізілуін қамтамасыз ету үшін бір орталыққа жұмылдырады. Мәселен, Қытайдың Ляньюнган, Чунцин, Сиань, Шеньжен округтерінен шыққан тауарларды экспорттау үшін осы хабтың қызметі пайдаланылатын болады. Құрылым көліктік-логистикалық қызмет тапсырыстары пакетін әзірлейді. Коммерциялық ұсыныстардың алға жылжуына маркетингтік шаралардың ұйымдастырылуын қамтамасыз етіп, Қазақстан аумағы арқылы тасымалдауды жасақтау істерімен айналысады.
Бүгінгі таңда Қытай елінен Еуропаға Қазақстан аумағы арқылы жүк тасымалдау мерзімі теңіз жолымен салыстырғанда үш есеге азайып, 14-16 күнде межелі жерге жеткізіліп жүр. Енді, бұдан былай «Қазақстан темір жолы» ҰК» АҚ пен «KTZ Express» АҚ бірлескен коммерциялық жобасы Қытаймен арадағы көліктік-логистикалық нарықтың дамуына зор ықпал етеді. Мысалы, өткен мамыр айында Қазақстан Қытайдың Ляньюнган портында аумағы 21,6 гектар көліктік-логистикалық терминал ашты. Терминалда Қытайдың магистральдық желісіне шыға алатын қоймалық орындар бар. Бастапқы өткізу мүмкіндігі шамамен жылына 500 мың ДФЭ, тәуліктік түсіріп-тиеу қуаты 10 пойыз деп жоспарланып отыр.
Осы орайда айта кетеріміз, Қытай мен Қазақстан аралығында 2012 жылы пайдалануға берілген екі транзиттік теміржол жүк өткелі Достық – Алашаңқай мен Алтынкөл – Қорғас қазіргі таңда жүк тасымалында жемісті жұмыс жасап тұр. Екі ел шекарасында «Қорғас – Шығыс қақпасы» арнайы экономикалық аймағы Қытайдан келетін жүктерді үйлестірудің өңірлік орталығы болып қалыптаспақ.
Қазақстанның көліктік-логистикалық операторы ретінде ҚТЖ ел аумағы ғана емес, шетелдерде де жүктерді жеткізудің «есіктен есікке дейінгі» тәртібін енгізбек. Осы мақсатта Ақтау портының халықаралық өткізу қабілеті өсіріледі. Қосымша барлық көлік түрлерін шоғырландыратын транзиттік теміржолдар салынады.
Компанияның Гонконгтегі жаңа офисі Қазақстан мен Қытай арасындағы жүк тасымалының артуына ғана емес, Гонконгтің жаһандық жүк жеткізу тізбегіндегі қаржы секторы мен логистикалық серіктесігіне тың серпін береді.
Нұрбай ЕЛМҰРАТОВ,
«Егемен Қазақстан».