Түркияның Конья қаласында WKF каратэден А сериясына кіретін халықаралық бәсеке мәресіне жетті. Осы маусымдағы екінші турнирде өнер көрсеткен еліміздің татами шеберлері толайым табысқа қол жеткізіп, екі алтын медаль жеңіп алды.
Спортты дамыту дирекциясының мәліметі бойынша, Қазақстан құрамасы сапынан кумите бағдарламасында сынға түскен 55 кило салмақтағы Белла Самашева финалда Босния және Герцеговина спортшысы Нейра Шиповичті қапы қалдырып, жарыс жеңімпазы атанса, 68 килодағы Лаура Әліқұл да Түркия татамиінде қарсылас шақ келтірмей, алтыннан алқа тақты.
Өзге жерлестерімізден Малика Әбжанова (-50 кг), Әсемгүл Ердәулет (-55 кг), Венера Жақсыбаева (-68 кг), Айдос Мұхат (-67 кг), Батырғали Әбілмансұр (-75 кг) өз салмағында 5-орынға тұрақтады. Анадолыдағы жарысқа ел құрамасынан жалпы саны 49 спортшы қатысқан болатын. Мұнда ең көп спортшыны жарыс қожайыны Түркия (187 спортшы) қосса, одан кейін Иран (136 спортшы) мен Италия (75 спортшы) тұр.
Жалпы, Түркиядағы турнирде әлемнің 76 елінен келген 1 100 каратэші шеберлік байқасты. Серияның келесі турнирін Ричмонд-Ванкувер (Канада), Ларнака (Кипр) мен Матозиньюш (Португалия) қалалары қабылдайды. Маусымдағы алғашқы бәсеке Грекия астанасында өткен болатын.
Айта кетейік, А сериясындағы бәсекелерде ең көп ұпай жинап, өз салмағындағы рейтингте 32 мықтының қатарына енген спортшылар жоғары санаттағы Премьер-лига сайыстарына жолдама алады.