Бүгінгі таңда Astana Hub халықаралық технопаркінде 1 043 IT-компания тіркелген, оның 179-ын әйелдер басқарады. Сондай-ақ кейінгі кездері ІТ-мамандыққа оқығысы келетін қыздардың саны артып келе жатқандығы байқалады.
Astana Hub бас директоры Мағжан Мәдиевтің айтуынша, Tech Orda ІТ-мамандыққа оқыту бағдарламасы аясында бөлінген 3 067 гранттың 39 пайызын әйелдер иеленген.
– Біздің технопарк ұжымындағы қыздардың үлесі 61 пайызға тең. оның ішінде 63 пайызы – басшылық қызметте. Яғни қазіргі уақытта еңбек нарығындағы гендерлік теңдік өзгеріп жатыр. Бірнеше жыл бұрын IT-сектор ер адамдарға арналған деп есептелсе, қазіргі жағдайда оның гендерге бағынбайтынын көріп отырмыз, – дейді ол.
Astana Hub экожүйесіндегі әйелдер басқаратын IT-стартаптардың басым бөлігі әлеуметтік және EdTech саласын дамытуға бағытталған. Мәселен, Әсем Тәжиева негізін қалаған Ozim Platform әлеуметтік стартабы ерекше күтімді қажет ететін балалары бар отбасыларға мобильді қосымша, YouTube арнасы және әлеуметтік желілер арқылы білім беріп, ақпараттық қолдау көрсетеді.
SmarTestPrep халықаралық емтиханға дайындық және ұсыныстар жөніндегі платформасының бас директоры Лаура Вайгорова қолданушыларға Spotify немесе Netflix сияқты ең қолайлы университет пен бағдарламаны ұсынатын 50 мың университет пен стипендиялар тізіміне негізделген жүйені сәтті дамытып отыр.
Qonzhyq App жобасының бас директоры Әйгерім Исатаева фольклорды жаңғыртуға және қазақ тілін дамытуға арналған мобильді қосымшаны іске қосқан. Мақсаты – жас ұрпақтың қазақ ұлттық музыкасына, әдебиетіне, мәдениетіне, салт-дәстүріне, тіліне деген қызығушылығын ояту.
Сондай-ақ әйелдер негізін қалаған IT-жобалар жылдам дамып, шетелдік нарыққа да шығып жатқан көрінеді. Яна Шойбекова басқаратын ең ірі DOOH смартборд желісін – Citix ақпараттық-навигациялық жүйесін Түркия мен БАӘ тұрғындары қолданып отыр. Citix компаниясы Ұлттық технологиялық даму агенттігінің «Қазақстандағы үздік 10 инновациялық жоба» рейтингіне енгенін айта кетейік.
– Көптеген компанияның тәжірибесіне қарасақ, қызметкерлердің гендерлік тепе-теңдігін сақтайтын бизнес табыстырақ болады. Әйелдер IT-саласын дамытуға белсенді қатысса, сала жылдамырақ дамиды деп ойлаймын. Экономиканы жаңа деңгейге көтеру үшін қоғамның әлеуетін дамытып, стереотиптерден арылып, әйелдерді ақпараттық технологиялар саласына көбірек оқытып, ынталандыру және жалақыны арттыру маңызды, – дейді Astana Hub басқарушы директоры Алина Әбдірахманова.
Қазақстанда жыл сайын ақпараттық-коммуникациялық технология саласына 30 мың маман қажет. Қазір еліміздегі IT-мамандардың 31 пайызы –әйелдер. Astana Hub қатысушылары арулардың ұжымды басқаруға барынша қабілетті, ақпараттық және әлеуметтік тұрғыда тиімді және орта деңгейдегі лауазымдағы әйелдерге жақсы үлгі екенін алға тартып отыр.