АҚШ Қаржы министрлігі Шетел активтерін бақылау жөніндегі басқармасы «Сбербанктің» Қазақстандағы еншілес банкі – Bereke Bank-ті Specially Designated Nationals – қаржы институтының санкциялық және секторлық санкциялар тізімінен шығарды. 2022 жылдың қыркүйегінен бастап аталған қаржы институтына «Бәйтерек» Ұлттық басқарушы холдингі иелік еткен еді.
«Бұл еліміздің қаржы нарығында болып отырған тарихи сәт. Bereke Bank-ті санкциядан шығару үшін акционер, Ұлттық банк, реттеуші орган мен Ішкі істер министрлігі және еліміздің АҚШ-тағы Елшілігі үлкен қолдау көрсетті. Банк кезіккен қиындықтарға төтеп беріп, өз клиенттері мен серіктестерінің алдында белгіленген міндеттемелерін орындап, еліміздегі үздік банктердің қатарына енген еді. Бұл қаржы институты қызметкерлерінің кәсіби біліктілігі мен сенімділігінің тағы бір дәлелі», дейді банктің басқарма төрағасы Андрей Тимченко.
Банк санкция кезінде де қызметін тоқтатпауға тырысты. Шектеулер көбінесе валюталық операциялармен, оның ішінде доллар және еуромен жасалатын операцияларға, корреспонденттік қатынастарға және шетелдік сервистерге байланысты болды.
Жылдың басында банк пруденциалдық нормативтерге сәйкес, капиталдың жеткіліктілік коэффициентін теңестіре отырып, түгелге жуық негізгі көрсеткіштерін жақсартқан. Басқарма төрағасы келешекте банк қызметінің одан әрі дамуына және нығаюына барынша күш салатындығын айтты.
Бүгінде Bereke Bank шоттардан ақша шешу, оларды толықтыру операцияларының спектрін, бөлшек клиенттер мен корпоративтік бизнестің барлық сегменті үшін қаржы өнімдерін, сервистерді, тауарлар мен қызмет ақысын төлеу операцияларын, ұлттық және шетел валютасындағы ақша аударымдарын, банкоматтар арқылы жүргізілетін операцияларды ұсынып отыр. Қызметтер жеке тұлғалар үшін «B-Bank» және заңды тұлғаларға арналған «B-Business» мобильді қосымшаларында қолжетімді. Қазір банктің ел аумағында 18 филиалы мен 111 құрылымдық бөлімшесі бар.
Жалпы, Қазақстандағы үш бірдей ресейлік еншілес банк санкция тұзағына ілінді. Олар – «Сбербанк», «Альфа-банк» және ВТБ (Қазақстан) Банк. «Альфа-банкті» әуелі «Банк ЦентрКредит» сатып алып, оны Eco Center Bank деп атады. Кейін оны өзіне біржола қосып алды. Ал ВТБ-ның Қазақстандағы банкін Мәскеудегі негізгі ВТБ қосымша капиталдандырды. Қазір ВТБ Қазақстан аумағында өз жұмысын жалғастырып жатыр. Активтер көлемі бойынша Қазақстандағы екінші қаржы институты болып келген «Сбербанктің» жұмысына шектеу қойылғаннан кейін оны «Бәйтерек» холдингі сатып алған еді. Ұлттық холдинг банктің атауын өзгертіп, басшылық құрамын жаңалап, оны ақыры санкция тізімінен шығарды. Алдын ала ақпараттар бойынша жақын арада «Бәйтерек» Bereke Bank-ті сатылымға шығармақ. Қаржы институты нарық талаптарына сәйкес, мемлекет қарауынан тыс дамуға тиіс деп санайды холдинг басшылығы.