Теннистен АҚШ-тың Хьюстон қаласында өтіп жатқан «ATP 250» турнирінің жұптық бәсекесінде өнер көрсетіп жатқан Андрей Голубев пен Александр Недовесов жарыстың ширек финалына шықты.
Қазақстан теннисшілері ерлер арасындағы бәсекенің алғашқы айналымында Жонатан Эйссерик (Франция) пен Давид Пел (Нидерланд) жұбымен шеберлік байқасты. Екі сағатқа жуық жалғасқан матчта жерлестеріміз 2:6, 7:6 (7:5), 10:4 есебімен жеңіске жетті. Енді Андрей мен Александр ширек финалда Андре Горансон (Швеция) мен Бен Маклахлан (Жапония) жұбымен кездеседі. Сонымен қатар Мексикадағы «Челленджер» турниріне қатысып жатқан Денис Евсеев те келесі айналымға жолдама алды. Ол бастапқы бәсекесінде доминикандық Ник Хардты екі сетте қапы қалдырды – 7:5, 7:6 (7:1).
АҚШ-тағы «Чарльстон WTA 500» турнирін сәтті бастаған әлемнің 47-ракеткасы Юлия Путинцева үшінші айналымға шыға алмады. Екінші айналымда әлемнің 17-ракеткасы ресейлік Екатерина Александровамен шеберлік байқасқан жерлесіміз 6:1, 6:3 есебімен жеңіліп қалды.