Екібастұздан елордаға ем іздеп келген Владимир секілді науқастарды дәрігерлер «Сұрақ белгісі кейпіндегілер» деп атайды екен. Яғни мұндай адамдар бүкірейген бойын тік ұстай алмай, жылдар бойы сүйек ауруының зардабын тартады. Алайда бұл азаптан да құтылуға болатынына Н.Батпенов атындағы Ұлттық ғылыми травматология және ортопедия орталығында жасалған операция көз жеткізді.
Аталған орталықтың хирургтері Екібастұздан келген науқасты біраз жыл қинаған ауруынан құтқарды. Операция МӘМС жүйесі аясында жасалды.
Бұл ауру алға қарау үшін адамның басын көтеруіне мүмкіндік бермейді. Науқастың бұл сырқаттан зардап шеккеніне бірнеше жыл болған. Мұндай ауруға операция жасау өте қиын және сирек жасалады екен. Тіпті Ресей дәрігерлері де науқасты қабылдаудан бас тартқан.
Академик Н.Ж.Батпенов атындағы Ұлттық ғылыми травматология және ортопедия орталығының хирургтері жоғары технологиялық медицина көмегімен 6 сағат бойы операция жасады. Сәтті жасалған операциядан кейін пациент оңалту емшарасын қабылдап жатыр.
«Жазға қарай Владимир белсенді өмір салтына толыққанды көшеді деп үміттенеміз. Ең бастысы – оңалту кезеңінен дұрыс өту», дейді омыртқа патологиясы бөлімінің меңгерушісі Сейдәлі Әбдалиев.
Осындай бір ғана күрделі операцияның құны орта есеппен бірнеше миллион теңге тұрады. Әлеуметтік медициналық сақтандыру қорынан медициналық қызмет көрсетуге қомақты қаражат бөлінеді. Жыл сайын медициналық сақтандыру есебінен травматология, нейрохирургия, кардиохирургия, урология, онкология және басқа да салалар бойынша көптеген қымбат операция жасалады. Мысалы, 2022 жылы елордада жоғары технологиялық медицина көмегімен 7 885 операция жасалды.
«Осындай күрделі операцияны маған МӘМС жүйесі арқылы тегін жасады. Сәтті өткен операциядан кейін өзімді әлдеқайда жақсы сезінемін. Орталық дәрігерлеріне алғысым шексіз», деп ризашылығын білдірді Владимир.
Аталған орталық – тірек-қимыл аппаратының ең күрделі ауруларына операция жасайтын, травматология және ортопедия мәселелері бойынша жетекші ұйым. Осы орталыққа жүгінгісі, МӘМС аясында көмек алғысы келген емделушілер Медициналық сақтандыру қорына хабарласуына болады. Сарапшылар сізге ТМККК шеңберінде және МӘМС жүйесінде медициналық көмек алу бойынша кеңес береді, мәртебесі мен төлемі бойынша ақпаратты тексереді, қажет болған жағдайда мәселені шешуге медициналық ұйымның сарапшыларын жұмылдырады.