Өскемен қаласы тұрғындарынан үлескер ретінде ақшаны заңсыз алған компания үй құрылысын аяқтамады, деп хабарлайды Egemen.kz ҚазАқпарат агенттігіне сілтеме жасап.
Қала әкімдігінің мәліметіне сүйенсек, «Дейнека» құрылыс компаниясы ешқандай рұқсат құжаттарын рәсімдемей, тұрғындардан үлескер ретінде ақшаны заңсыз алған. Өскемендіктерге келтірілген материалдық шығынның нақты мөлшері әлі анықталмады.
Оларға пәтер кілті былтыр берілуі керек болатын. Бірақ Есенберлин даңғылындағы екі үйдің біреуі де салынып бітпеді.
«Компания басшылығы қаржы жеткілікті болғандықтан құрылыс жұмыстары жалғасатындығын алға тартуда. Бірақ үлескерлер бұл сөзге сенбей, сотқа жүгінбек. Бұл мәселеде біз де шеткері қала алмаймыз. Басты міндетіміз – қала тұрғындарына заң шеңберінде қолдау көрсету», дейді қала әкімінің орынбасары Арман Ысқақов.
Қазір үлескерлер «Дейнека» компаниясына қарсы топтық талап-арыз дайындап жатыр.