Алматыдағы Мемлекеттік орталық музейде тәжік-ауған шекарасында ерлікпен қаза болған жауынгерлерді еске алу мақсатында «Ерлік – ерге мұра, ұрпаққа ұран» атты көрменің тұсауы кесілді.
ҰҚК Шекара қызметі «Застава тарландары» республикалық қоғамдық бірлестігінің Алматы қалалық филиалының басшылығы, Ұлттық ұланның әскер және локальды қақтығыстары ардагерлерінің басын қосқан іс-шараға «Басқа мемлекеттер аумағындағы ұрыс қимылдар ардагерлері мен мүгедектерінің» қоғамдық бірлестігі ұйытқы болды. Мемлекеттік орталық музейдің үшінші қабатында ашылған көрме қонақтарын Ұлттық ұланның Алматы қаласындағы әскери бөлімдерінің бірінен шақырылған Әскери оркестр әуезді әуенмен қарсы алды. Әрі қарай еліміздің Әнұраны шырқалып, шекарашы ардагерлердің «Застава тарландары» республикалық қоғамдық бірлестігі Алматы қалалық филиалының төрағасы отставкадағы генерал-майор Марат Мажитов ержүрек ұландар тағылымын тебірене еске алды.
– Осыдан 28 жыл бұрын Памир тауындағы Пшихавр шатқалында бес сағатқа созылған қарулы қақтығыс кезінде ішкі әскердің 17 қазақ жауынгері ерлікпен қаза тауып, 33-і ауыр жараланды. Ал соның алдында ғана, 1994 жылдың қыркүйегінде шекарашылар өздерінің қайсар мінезді қаруластары Раджан Батырхановтан мәңгіге айырылып еді. Ішкі әскердің он жеті сарбазы да сол күні Раджанның ерлігін қайталады. Естелік ескірмейтіні секілді ерлік те ешқашан ұмытылмайды. Кейінгі ұрпақтың жадында мәңгі сақталып, жастарды патриоттық рухқа баулиды, – деді Марат Мажитов.
Сонымен қатар Шекара қызметінің ардагері, отставкадағы генерал-майор Тоқтасын Бузубаевтың да тәжік-ауған шекарасы туралы айтар естеліктері аз болған жоқ. Ғибратты іс-шараны өткізуге мұрындық болған Ұлттық ұланның ардагері, запастағы полковник Ерлан Алданазаров сол бір қаралы күннің куәгері ретіне оқиғаның картинасын көпшіліктің көз алдына әкелді.
– 7 сәуір күні қаза тапқан 17 сарбаз менің ротамның жауынгерлері болатын. Боздақтар менің көз алдымда оққа ұшқандықтан, әлі күнге дейін жаныма батады. Олардың бар көретін қызықтары әлі алда еді. Ауыр шайқастан соң мен ұрыстан аман шыққан жауынгерлеріме ерлік жасағандарын айтып, ризашылығымды білдірдім. Елге қайтқысы келетіндерге рұқсат берілетінін жеткіздім. Сонда менің ротамдағы жауынгерлер бір ауыздан қаза болған қарулас жолдастарының кегін қайтармай, өздерінің елге оралмайтындарын айтты, – деген Е.Алданазаров бүгін біздің арамызда сол күні бойларындағы күшті рухтың ұшқынын көрсеткен сарбаздардың қатарында болған үш жауынгерінің отырғанын тілге тиек етті.
Олар – Еламан Үмбетов, Жұмахан Шашубаев, Жанат Несіповтер екен. Командирлерінің өздеріне көрсеткен лебізіне бүгінде ел ағасына айналған сарбаздар қолдарын кеуделеріне қойып, ризашылық танытты. Осылайша, өз сарбаздарының ерлігіне ерекше тоқталған Ерлан Жарылқасынұлы өзі басқаратын «Басқа мемлекеттер аумағындағы ұрыс қимылдары ардагерлері мен мүгедектерінің» қоғамдық бірлестігінің осындай патриоттық рухтағы іс-шараларды үздіксіз жалғастыра беретінін жеткізді.
Сонымен қатар тағзым іс-шарасын көпшілікке танымал Шекара қызметінің өнердегі өкілдері Зәмзәгүл Кенжебаева мен Бақтияр Ермаханов патриоттық рухтағы әндерімен әрледі. Зәмзәгүл өзінің Раджан Батырхановқа арнаған авторлық әнін орындаса, Бақтиярдың «Горячие точкий» атты туындысы жиналғандардың жүрегінен орын алды.
Он жеті сарбазды ұлықтауға арналған іс-шараның соңы қонақтардың көрмені тамашалауына ұласты. Мұнда тәжік-ауған шекарасында өткен ұрыстың жәдігеріне айналған заттар қойылып, музей қабырғасына отты күндерден мағлұмат беретін көрнекі құралдар ілінген. Әйнек астындағы әрбір зат өткен күннің белгісіндей болып, көзге оттай басылады...
АЛМАТЫ