Алматыда Халықаралық дзюдо федерациясының (IJF) ұйымдастыруымен өткен төрешілердің семинар-емтиханы аяқталды.
Төрешілік қызметті кәсіп еткен отандық мамандар семинар барысында біліктіліктерін арттырып қана қоймай, емтихан тапсырып, соның қорытындысы бойынша арнайы сертификат алды. Атап айтсақ, жерлестеріміздің арасынан Самат Сапашев «IJF International» дәрежесіне көтерілді. Яғни ол алдағы уақытта Олимпия ойындары мен әлем чемпионаттары және басқа да аса ірі халықаралық жарыстарда қазылық ету құқығына ие болады. Асхат Житкеев пен Николай Ивановқа «IJF Continental» сертификаты табыс етілді. Бұл мамандарды енді біз құрлықтық додалардан көре аламыз.
IJF төрешілер комиссиясының төрағалары Армен Багдасаров пен Даниэль Ласкау және Азия дзюдо одағы төрешілер одағының директоры Мун Вон Боенің жетекшілігімен өткен семинар барысында алыс-жақын шет мемлекеттерден келген 19 төрешіге құрлықтық және 21 қазыға халықаралық дәрежедегі сертификат берілді.