Шайбалы хоккейден Қазақстан ұлттық құрамасы мен ҚХЛ-да өнер көрсететін елордалық «Барыс» клубының ойыншылары Егор Петухов, Антон Сагадеев және Алексей Маклюков (2017-2021 жылдары «Барыс» сапында ойнаған) Қазақстан азаматтығынан бас тартты.
Шайба.kz интернет басылымының мәліметі бойынша, жоғарыда аты аталған үш ойыншы Ресей азаматтығында қалып, ел құрамасы сапында ойнаудан бас тартқан. Бұған дейін Е.Петухов «Барыс» сапынан кететіні айтылған. А.Маклюков соңғы екі маусымды Магниторскінің «Металлург» клубында өнер көрсетсе, кейінгі төрт жылда «Барыстың» намысын қорғаған А.Сагадеев енді карьерасын «Сочиде» жалғастырмақшы.
Ресейдің Барнаул қаласында дүниеге келген Егор Петухов Қазақстан азаматтығын 2013 жылы, Мәскеу облысында туған Алексей Маклюков 2018 жылы алған. Ал Антон Сагадеев Қазақстанның тумасы болса да, көк паспорттан бас тартқан.
Қазіргі таңда шайбалы хоккейден ұлттық құрама 2023 жылғы Латвияның Рига, Финляндияның Тампере қаласында өтетін әлем чемпионатына дайындалып жатыр. Топтық кезеңде Қазақстан Канада, Чехия, Латвия, Словакия, Словения, Норвегия және Швейцариямен ойнайды.