Ауғанстанға гуманитарлық көмектің кезекті легі жеткізілді. Оны Премьер-министрдің орынбасары – Сауда және интеграция министрі Серік Жұманғарин Кабулға барған сапарында елдің билік өкілдеріне тапсырды. Сондай-ақ Қазақстан Ауғанстанда сауда үйін ашуға келісті. Енді Талибан билігі елімізде өз дипломаттарын қабылдауды сұрап отыр.
Ауғанстанға 5 403 тонналық негізгі гуманитарлық жүк теміржол арқылы жеткізілді. 81 вагонға негізінен азық-түлік өнімдері, атап айтқанда, сүт консервілері, өсімдік майы, ұн, қарақұмық жармасы тиелді.
– Біз Президенттің тапсырмасымен Қазақстанның ауған халқына гуманитарлық көмегін жеткізу үшін Ауғанстанға арнайы келдік. Халықаралық қоғамдастық, оның ішінде Қазақстан да ауған халқын қиын жағдайда көмексіз қалдыра алмайды. Біздің гуманитарлық миссиямыздың қасиетті Рамазан айында өтіп жатқаны оған ерекше сипат береді. Қасиетті айда барлығыңызға бейбіт өмір мен сабыр тілеймін, – деді Премьер-министрдің орынбасары.
Жұмыс сапары кезінде Серік Жұманғарин Ауғанстанның сауда және өнеркәсіп министрінің міндетін атқарушы Нұриддин Азизимен, вице-премьер Абдул Ғани Барадармен, Сыртқы істер министрі Әмір Хан Муттакимен, Байланыс және телекоммуникация министрі Наджибулла Хакканимен кездесті.
– Қазақстан – Ауғанстанмен өзінің дипломатиялық қарым-қатынасын сақтай отырып, көршілес елдермен бейбіт байланысын қолдайтын тұрақты және гүлденген мемлекет ретінде көргісі келетін санаулы елдердің бірі. Біз қалыптасқан сауда-экономикалық, көлік-логистикалық және энергетикалық байланыстарды одан әрі дамытуға мүдделіміз. Премьер-министрдің сауда жөніндегі орынбасары ретінде елдеріміздің сауда саласындағы және өңірлік ауқымдағы ынтымақтастықты дамыту үшін зор әлеуеті бар екеніне сенімдімін. Біз сауда-экономикалық саладағы, оның ішінде гуманитарлық көмек арқылы ынтымақтастықты дамыту жұмыстарын жалғастатыра дайынбыз. Қазақстанның Ауғанстанға экспорттық әлеуеті азық-түлік, мұнай-химия, химия, металлургия, жеңіл, машина жасау, құрылыс және басқа салаларда 174 млн долларын құрайтын 46 тауар түрінен тұрады. Бұл тауарларды екіжақты сауда айналымына қосу екі елге де тиімді болады деп санаймын, – деді Серік Жұманғарин.
Статистикалық мәлімет келтіре кетсек, осы жылдың қаңтар-ақпан айларында екі ел арасындағы тауар айналымы 2 282,6 млн долларға жетті. Бұл өткен жылдың сәйкес кезеңімен салыстырғанда 94,6%-ға жоғары (145,2 млн доллар). Қазақстаннан Ауғанстанға экспорт 95 пайызға өсіп, 281,5 млн долларды, ал Ауғанстаннан Қазақстанға импорт көлемі 28,3 пайызға өсіп, 1,1 млн долларды құрады.
Талибан билігі еліміздің үкімет мүшелерін қабылдай отырып, Кабулда қазақ-ауған бизнес-форумын ұйымдастырды. Оған Қазақстанның тамақ өнеркәсібі саласындағы 18 экспорттаушы кәсіпорын қатысты. Олар ұн, макарон, кондитерлік және сүт өнімдерін, сусындарын ұсынды. Бизнес-форумда кәсіпкерлер Ауғанстанға жалпы сомасы 4 млн долларды құрайтын ұн жеткізуге келісім жасасты.
Сондай-ақ Ауғанстанның Герат қаласында Қазақстан сауда үйі ашылатын болды. Сауда үйі екі ел арасындағы сауда-экономикалық қатынастарды жандандыруға, тауар айналымын ұлғайтуға, сауда-экономикалық, телекоммуникациялық, көлік және логистикалық байланыстарды дамытуға, аймақ елдерімен сауда жасау үшін Ауғанстанның транзиттік және шекара маңындағы әлеуетін пайдалануға, Қазақстан экономикасына инвестициялар тартуға көмек береді. Жалпы алғанда Қазақстанның сауда үйі Қазақстан мен Ауғанстандағы «B2B» форматындағы іс-шаралар ұйымдастыруды қолға алады.
Ал Ауғанстан Премьер-министрінің экономика мәселелері жөніндегі орынбасары Абдул Ғани Барадар Серік Жұманғарин бастаған делегациямен кездесу кезінде екіжақты қарым-қатынастарды нығайту үшін елімізде жаңа ауған дипломаттарын қабылдауды сұрады.
– Ауғанстан тарапы Қазақстанға гуманитарлық көмек көрсеткені үшін алғыс білдіреді. Біз әрқашан жылы қарым-қатынас пен тығыз ынтымақтастықты сақтап келе жатқан елдерміз. Сондай-ақ Ауғанстанда орталық үкімет құрылып, қауіпсіздік сақтау қамтамасыз етілгелі теміржол желілерін дамыту секілді ірі жобаларға инвестиция салуға мүмкіндік ашылды, – деді Абдул Ғани Барадар.
Өз кезегінде Серік Жұманғарин мұндай байланыстарды нығайту үшін жақын арада еліміз ауған дипломаттарын қабылдайтынын айтты. Негізі Қазақстанның үкімет мүшелері Ауғанстанға іскерлік байланыстар орнату, іскерлік мәселелерді жылдам шешу үшін командалар құру, ауғандық кәсіпкерлердің виза алуларына, екі елде банк бөлімшелерін ашу және Ауғанстанның «Afgan Trans» секілді маңызды жобасы бойынша ынтымақтастықты талқылау мақсатында ресми сапар жасады.