Алматыда бокстан өтіп жатқан «Қазақстан Республикасы Президентінің кубогы» IV халықаралық турнирінің үшінші күні бес салмақ дәрежесінде ширек финалдық жекпе-жектер өтіп, жартылай финалдық жұптар анықталды.
Осы күні 10 боксшымыз 49, 52, 69, 81 килоларға дейінгі және аса ауыр салмақта шаршы алаңға шығып, олардың тоғызы жеңіске жетті. Ең жеңіл салмақтағы әлем чемпионы Біржан Жақыпов, Олимпиаданың күміс жүлдегері Әділбек Ниязымбетов өздерінің бабында екендерін көрсетті. Олар қарсыластарын техникалық нокаутпен жеңсе, 69 килодағы Сағадат Рахманқұлов тәжірибелі Әзербайжан боксшысы Тамерлан Абдуллаевты нокдаунға түсірді.
Бұдан кейін Ілияс Сүлейменов пен команда капитаны Данияр Елеусінов те айқын басымдықпен жеңіске жетті. Екеуі де қарсыластарын 3:0 есебімен ұтты.
Ауыр салмақтағы алыптарымыз есе жіберген жоқ. Иван Дычко өзбекстандық Мирзохиджон Абдуллаевты, Қамшыбек Қонқабаев Ростислав Архипенконы (Украина) тізе бүктіріп, жартылай финалға шықты. Өкінішке қарай, 81 кило салмақтағы Нұрдәулет Жарманов отандастарының жолын жалғастыра алмады. Ол Украина боксшысы Александр Ганзулядан бір ұпай айырмашылығымен жеңіліп қалды.
Кеше қалған бес салмақтағы отандастарымыз қолғап түйістірді.
Дастан КЕНЖАЛИН,
«Егемен Қазақстан».