Қазақстанда тұңғыш рет «Hardcore» компаниясының ұйымдастыруымен аралас жекпе-жектен халықаралық турнир өтті. Бұл жарыста қазақтың төрт бірдей спортшысы күш сынасты.
«Алматы аренада» өткен турнирдің бастапқы кардында Азамат Бақытов ресейлік Максим Соколовты ұпай санымен ұтса, Бағдат Дүйсенбаев Игорь Барабановтың «ауырту» тәсіліне түсіп қалды. Негізгі бәсекелердің бірінде Қуат Хамитов октагонға шықты. Оның қарсыласы – Залимхан Юсупов. Дағыстандық файтер кезінде еркін күрестен Өзбекстан құрама командасы сапында өнер көрсетіп, Азия ойындарында қола медальды иеленді. 2016 жылы Рио Олимпиадасында қатысып, Ташкенттегі әлем чемпионатында бесінші орынға табан тіреді. Біздің жігіт те осал емес. «Найман» деген жанама есіммен танылған қандасымыз спорттың бұл түрінде елеулі табыстарға қол жеткізді. Бұл бәсекеде Қуат басымдық танытып, жеңіс тойын тойлады.
Жарыстың басты жекпе-жегінде Мұратбек Қасымханов әзербайжандық Аловсет Мәмиевті үш раунд бойы қуып жүріп сабады. Төрешілер бірауыздан қазақ файтерінің мықтылығын мойындады. Ал титулдық жекпе-жекте Ресейдің алыбы Хадис Ибрагимов бразилиялық Фернандо Родригесті нокаутпен жеңді.