«Жәдігер жерде қалмасын!» акциясымен ақтөбеліктер облыстық тарихи-өлкетану музейінің қорына біраз құнды жәдігер тапсырды. Ел ішінде әлі күнге дейін ата-бабаларының «көзін» үйлерінде сақтап жүргендер көп. Соңғы жылдары қорға ұстаның көрігі, тары түйетін келі-келсап, алаша, әдемі өрнектелген сандық-кебеже сияқты тұрмыстық бұйымдар көптеп түсті.
Музей қорына түскен соңғы жәдігерлерді Білім беру ісінің құрметті қызметкері, Қазақ ұлттық жаратылыстану ғылымдары академиясының корреспондент-мүшесі Абай Орынбаев, белгілі қолөнер шебері Ерқосай Әбілов, Ауған соғысы ардагерлерінің төрағасы Аслан Балқасынов, жеке кәсіпкер Артем Василенко, Ақсерік Төремұратова, Ақалма Ізбасова, Сырым Байдрахманов тапсырды.
Жыл ішінде мұражайға 1 216 экспонат түскен. Олардың қатарында музей ардагері Рысжан Ілиясованың жеке заттары, Әбілқайыр ханның жары Бопай ханым кратинасы, соғыс ардагерлерінің орден-медальдары, каратэ-додан Халықаралық дәрежедегі спорт шебері Ринат Сағындықовтың спорттық құралдары бар. Құнды экспонаттар қатарында екі жүз жылға жуық тарихы бар құман мен бір ғасыр бұрын қолданылған түбіт тарайтын ая бар. Мұғалжар ауылының тұрғыны Серікбай Есетов Төсбұлақ деген жерде жазда шөп шауып жүріп құман тауып алған. Құманның астында 1833 деген жазу бар екен. Салмағы 2 килодан асатын жез құман құм ішінде жақсы сақталған.
Ертедегі шеберлердің қолдарынан шыққан заттарға қарап, қазақтың ұлттық тұрмыстық бұйымдарын сол үлгіде жаңарта білу өте маңызды, дейді қолөнер шебері Бұлбұл Кәпқызы. Өйткені қазіргі шеберлер көп жағдайда қазақты өрнектерді қолдану ретін біле бермейді екен. Оның айтуынша, ертеде қыз-келіншектердің камзолдары мен бешпенттерінің өңіріне гүлдердің өрнегін көп салған. «Соның ішінде қызғалдақтың суреті басым. Мұндай ерекшелік қазақтың барлық өңіріне де тән. Әжелеріміз қай киімге өрнек салуды жақсы білген. Ал қазіргі шеберлер көп жағдайда ерлер мен әйелдер киімдерінің өрнектерін шатастырғаны былай тұрсын, киіз-сырмаққа жапсыратын қошқар мүйізді барлық қиімге жапсыруды сәнге айналдырды. Бұл дұрыс емес», дейді қолөнер шебері.
Жәдігерлерді қабылдау акциясы жыл бойы жалғасады. Сондықтан да тұрғындар үйде елеусіз жатқан ескі бұйымдарды музей қорына әкеп тапсырғаны абзал, дейді музей мамандары. Мұндай заттарда ертедегі ұсталар мен зергерлердің қолтаңбасы қалған. Киеге де ие керек.
Ақтөбе облысы