UFC-де өнер көрсетіп жүрген аралас жекпе-жектің хас шебері Шавқат «Номад» Рахмонов кезінде орта салмақтың «уақытша» чемпиондық белбеуі үшін таласқан Келвин Гастелуммен күш сынасқысы келетінін мәлім етті. АҚШ спортшысы да «кет әрі» емес секілді. Егер екі тарап ортақ мәмілеге келсе, жер-жаһан жанкүйерлері аса қызықты айқастың куәсі болатыны анық.
32 жастағы Келвиннің ата-анасы ертеректе Мексикадан АҚШ-қа қоныс аударған. Өзі Калифорния штатының Сан-Хосе қаласында дүниеге келгенімен, балалық пен жастық шағы Юма шаһарында өтті. Алғашында Гастелум еркін күреспен айналысса, есейе келе аралас жекпе-жекпен шұғылданды. 2013 жылы «The Ultimate Fighter» деп аталатын реалити-шоуда көзге түскеннен кейін дарынды жігіт атақты Чейл Сонненнің командасына қабылданды. Түрлі турнирлерде қатарынан алты рет жеңіске жеткеннен кейін UFC-мен келсімшартқа отырып, «Темір» деген жанама есімге ие болды. Спорттың бұл түрінде АҚШ файтері барлығы 26 кездесу өткізіп, 17 мәрте жеңіске жетті. 10 қарсыласын есінен тандырды. Сегіз рет ұтылып, тағы бір бәсекенің нәтижесі есепке алынған жоқ. Сол жекпе-жектерде оны тек Крис Вайдман (2017 жылы) мен Джек Херманссон (2020) ғана мерзімінен бұрын жеңді. Қалған айқастарда шешімді төрешілер шығарды.
Кезінде Келвин Гастелу Нейт Марквард, Джонни Хендрикс, Тим Кеннеди, Майкл Биспинг, Роналду Соуза, Крис Кертис сынды саңлақтарды оңдырмай сабады. 2017 жылы Бразилияның Форталеза қаласында өткен турнирде ол әйгілі Витор Белфортты бірінші раундта ұрып жықты. Кейіннен «Темірдің» марихуана шеккені анықталып, бұл бәсекенің нәтижесі есепке алынбады. 2019 жылдың сәуір айында Келвин орта салмақтағы «уақытша» чемпиондық атағы үшін айқасты. Бірақ бұл тартыста Исраэль Адесаньяның асығы алшысынан түсті.
Ал Шавқат Рахмоновтың жүріп өткен жолы жанкүйерлердің көз алдында. 28 жастағы қандасымыз 17 рет октагонға шығып, барлық бәсекеде айқын басымдық танытты. Сегіз қарсыласын ұрып жықса, тоғызы «қылқындыру» немесе «ауырту» тәсілінен кейін жер тоқпақтауға мәжбүр болды. Кейінгі жекпе-жегін «Номад» биылғы жылдың 4 наурызында Лас-Вегаста жергілікті файтер Джефф Нилге қарсы өткізіп, оны үшінші раундта «қылқындырып тастады».