Ұлттық құрылтайдың тарихи маңызы зор аймақтарда өтуі – ежелгі дәстүрдің жаңғыруы. Түркістанда елдік мәселелер қозғалып, нақты шешімдер қабылданды.
Тарихымызда ұлт ұстындарының Күлтөбе, Мәртөбе мен Ордабасыда жиналып, кеңес құрғаны белгілі. Былтыр Ұлытауда басталып, араға жыл салып Түркістанда жалғасын тапқан Ұлттық құрылтай сәтті өтті.
Президент өз сөзінде «Әбіш Кекілбаев «Қазақ рухының қағбасы», деп атаған Ордабасы осы жерге тиіп тұр. Осынау әйгілі төбелерде халқымыздың игі жақсылары сан рет бас қосқан. Болашақта да осы мәртебелі миссиясын атқара береді», деп бұл істерді үйлестіру міндеті мен жауапкершілігі өңірді басқарушы азаматтарға жүктелетінін баса айтты. Сондай-ақ Қожа Ахмет Ясауи кесенесіне ұлттық мәдени-тарихи ескерткіш мәртебесін беру туралы енгізілген ұсынысты қолдайтынын білдірді.
Мемлекет басшысы Ұлттық құрылтайдың екінші отырысына «Әділетті Қазақстан – Адал азамат» атаудың берілу мәні бар екенін атап өтті. «Әділетті Қазақстан» мен адал қызмет ету – егіз ұғым. Жуырда орын алған зардабы мол оқиғаны тілге тиек етіп, біз үшін сабақ болғанын жеткізді. Ауыр сынақтарды тек бірлік арқылы жеңетініміздің тағы бір айғағы болды.
Азаматтардың сана-сезімі жаңғырмай реформа немесе бастаманы іске асты деу бекер екенін де сөз етті. Расымен азаматтардың дүниетанымы, ұстанымы мен пиғылы бір арнада тоғыспаса және өзгермесе нәтиже күту де бос сөз. Мемлекет пен қоғам ортақ іске жұмылғанда ғана өміршең идеология қалыптаса бастайды.
Қ.Тоқаев ортаға салған мәселелер және негізгі бағыттарды шешімдерімен бірге мәлімдеді. Ең әуелі мемлекеттік нышандардың алар орнына тоқталып, аймақтық нышандарды біркелкі етіп ретке келтіруді тапсырды. Мемлекеттік наградаларды беруде халықтың ықыласы ескеріліп, тарихи тұлғаларымыз Әл-Фараби, Абай, Ахмет Байтұрсынұлы атындағы сыйлықтар беріледі. Республикада енді «Еңбек күніне» орай ең үздік мамандар мемлекеттік деңгейде ұлықталады.
Президент Қожа Ахмет Ясауидің туғанына 930 жыл толуына орай, «Ясауитану» ғылыми орталығын немесе институтын құру бастамасын көтерді. Бұл шешім ғұламаның түркі халықтарына қалдырған еңбегіне жасалатын құрмет деп есептеймін. Жағымды жаңалық мұнымен біткен жоқ. Президент жақында Марал ишанның Кенесары ханға сыйлаған Құраны табылғаны туралы ақпаратпен бөлісті. Екі ғасыр бойы қолдан-қолға көшкен Құран қалпына келтірілген соң Қожа Ахмет Ясауи кесенесіне қойылғаны жөн деген байламға келіпті. Мемлекет басшысы: «Бұл оқиға Қазақстанның жаңа дәуірінің берекелі бастауы болсын деп тілейік», деп жақсы ырымға балады.
Қазақстанда бұған дейін түрлі спорттық олимпиадалар өтті. Дегенмен ұлттық спортты насихаттайтын жарыстар ұйымдастырылмаған еді. 2024 жылы елімізде V Дүниежүзілік көшпелілер ойындары өтеді. Бұл сайысқа Түркістан облысының спортшылары қатысады.
Ұлттық құрылтайда ақпараттық саясат, кино өндірісі, архив ісі, балалар кітапханасы бағдарламасы, шекаралас аудандарды қалпына келтіру және ауылдарды дамыту жайында тапсырмалар жүктелді. «Президент – әулие емес, халықтан биік тұлға емес», деген Қ.Тоқаев өзін мадақтаудан гөрі мемлекет пен халық мүддесі үшін адал қызмет ету керектігін ескертті.
Бейсен ТӘЖІБАЕВ,
Түркістан облысы әкімінің орынбасары