Халықаралық футбол федерациясы (ФИФА) ұлттық құрамалардың шілде айындағы рейтингін жариялады. Маусым айында Қазақстан ұлттық құрамасы сегіз саты жоғарылап, 112-ден 104-орынға көтерілген еді. Шілдедегі рейтингте аса қатты өзгеріс бола қойған жоқ.
Магомед Адиев шәкірттері маусым айында 2024 жылғы Еуропа чемпионатының іріктеу кезеңінде екі матч өткізіп, екеуінде де жеңіске жеткен болатын. Сырт алаңдағы бірінші кездесуде Сан-Марино құрамасын жеңсе (3:0), екінші ойында Солтүстік Ирландияны тізе бүктірген-ді – 1:0.
ФИФА рейтингінің алғашқы ондығында тұрған құрамалардың да орындары өзгеріссіз қалды. Әдеттегідей рейтингте 2022 жылғы әлем чемпиондары – Аргентина құрамасы көш бастап тұр. Одан кейінгі орындарға Франция, Бразилия, Англия, Бельгия, Хорватия, Нидерланд, Италия, Португалия және Испания жайғасқан.