Теміртауда жылу көздері мен жылу желілерін ауқымды реконструкциялау жұмыстары жүріп жатыр. Бұған дейін жазғанымыздай, Металлургтер қаласында өткен жылыту маусымы кезінде 400-ге жуық апат орын алған. Кеңес кезінде орнатылған жылу құбырларының 70 пайызы тозған. Қазір жылу құбырларын жаңарту жүріп жатыр. Премьер-министрдің бірінші орынбасары Роман Скляр Қарағанды облысына жұмыс сапарында жүргізіліп жатқан жұмыстардың барысын тексерді.
«АрселорМиттал Теміртау» АҚ 2-ЖЭО-сында жылу беру маусымына дайындық және жетінші қазандықтың құрылысы туралы кәсіпорынның бас директоры Владимир Яблонский баяндады. Оның айтуынша, үш қазандық пен үш турбиналы генераторды жөндеу жұмыстары аяқталуға жақын. Бұған қоса жетінші қазандықты салу бойынша маңызды жобаны іске асыру кешіктірілуде. Себепті жауапты орган былай түсіндіреді: нысанда жұмысшылар жетпей жатыр, негізгі жабдықтар мерзімінен кешігіп орнатылуда.
Мердігер компания басшылығының («AB Construction» ЖШС) есебін тыңдаған Р.Скляр құрылыс-монтаждау жұмыстарын уақтылы аяқтау қажеттігін белгілеп, ескерту жасады.
Р.Склярға жылу желілерін жөндеу бойынша бағдарлама таныстырылды. Қаладағы жылу желілерінің барлық тозған учаскесі бойынша жаңартылу жұмыстары жүріп жатыр. Р.Скляр жауаптыларға жұмысты жеделдету керектігін, жылу беру маусымына дейін толық аяқтауды қатты тапсырды.
Сонымен қатар Премьер-министрдің бірінші орынбасары Қарағанды, Шахтинск қаласының және Топар кентінің жылыту қазандықтарын аралады.
«Топар» МАЭС басшылығы негізгі және қосалқы жабдықтарды күрделі және қалыпты жөндеу жұмыстары кесте бойынша жүріп жатқанын хабарлады. «Бүгінгі таңда жөндеу жұмыстары 60 пайызға орындалды. Жоспардан кешікпей келе жатырмыз. Барлық міндеттемені толық орындаймыз», деді «Топар»МАЭС операциялық директоры Александр Бузо.
Шахтинск қаласының жылу желілері Теміртау секілді 75 пайызға тозып тұр. 10 жыл бойы еш энергия көзі күрделі жөндеу көрмеген. Биыл үш қазандық пен екі турбина жөнделіп жатыр. Р.Скляр жауаптыларға барлық жұмыс уақытында аяқталуы керектігін, жеделдету қажеттігін қатаң ескертті.
Облыс орталығында да осы бағыттағы жұмыстар қызу жүріп жатыр. Алдағы жылу беру маусымына дейін 16 қазандық пен 10 турбина жөнделіп жатыр. Мұндағы жұмыстар кесте бойынша жүріп жатыр. Биылғы жөндеу жұмыстарына бағытталған қаржы көлемі 13 млрд теңгені құрайды. Бұл туралы бірінші вице-премьерге «Қарағанды Энергоорталық» компаниясының басшылығы да баяндады. Ол облыс орталығының тұтынушыларын жылумен және электр энергиясымен қамтамасыз етеді. Құрамына екі энергия көзі кіреді: 3-ЖЭО және 1-ЖЭО.
Сондай-ақ Р.Склярға 3-жылыту қазандығының құрылыс барысы туралы айтылды. Жоба кезең-кезеңмен жүзеге асырылып жатыр. Мұндағы аталған жұмыс жүйелі атқарылса, жылумен жабдықтау жүйесін жақсартуға және қаланың жаңа нысандарын жылумен қамтамасыз етуге мүмкіндік мол болмақ.
Қасымхан ҒАЛЫМ,«Egemen Qazaqstan»