Испанияның Вальдепеньяс қаласында футзалдан «Mucho Mas» деп аталатын халықаралық турнир өз мәресіне жетті.
Жартылай финалда Алматының «Қайраты» жергілікті «Барселонадан» 1:6 есебімен ойсырай ұтылды. Біздің командамыздың ойыншылары арасындағы жалғыз голдың авторы – Денер Родриго. «Барселонаның» сапында Катела дубльдің авторы атанса, Серхио Гонсалес, Диего және Адольфо бір-бір реттен нысананы дәл көздеді. Тағы бір допты алматылықтар өз қақпасына соғып алды. Екінші жартылай финалда «Вальдепеньяс» «Пальманы» 4:3 есебімен ұтты. Қола медаль үшін бәсекеде «Қайрат» «Пальмамен» кездесіп, олардың қақпасына жауапсыз жеті гол соқты – 7:0. Бразилиялық легионер Денер Родриго хет-трик жасаса, Кайо Руис, Эдсон, Аллисон де Лима және Дуглас нысананы дәл көздеді. Ал бас жүлде «Барселонаға» бұйырды. Финалда олар «Вальдепеньясты» 2:1 есебімен жеңді.
«Қайрат» 23-26 тамыз күндері Португалияда өтетін «Masters Cup» додасында да бақ сынауды көздеп отыр. Бұл жарысқа алматылықтардан бөлек, жергілікті «Спортинг», «Бенфика» және «Брага» қатысады.