Парламент Мәжілісінің спикері, «Аmanat» партиясының төрағасы Ерлан Қошанов партияның республикалық қоғамдық қабылдау бөлмесінде азаматтарды қабылдады.
Еліміздің әр өңірінің тұрғындары инфрақұрылымды дамытуға, таза ауыз сумен қамтамасыз етуге, ерекше қажеттіліктері бар адамдарды қолдауға қатысты және басқа да мәселелермен «Аmanat» партиясына жүгінді. Мәселен, Шығыс Қазақстан облысындағы Алтай қаласының 40 мың тұрғыны атынан хабарласқан бір топ азамат Осинов асуын айналып өтетін жаңа жол салу мәселесін көтерді. Бұл асуға жыл сайын мыңдаған турист келеді.
«Алтай және шекара маңындағы Катонқарағай аудандарының тұрғындары үшін бұл жолдың маңызы зор. Мұндағы құрылыс 2018 жылы басталған еді, бірақ кейін тоқтап қалды. Мемлекеттік орман қорынан жер телімдерін беру жұмыстары кешіктірілуіне байланысты жолды жөндеуге қажет материалдар қымбаттап кетті. Сізден жолды жөндеу жұмыстарын тездетуге көмек көрсетуіңізді сұраймыз», делінген азаматтардың ұжымдық үндеуінде.
Ерлан Қошанов партия филиалына Индустрия және инфрақұрылымдық даму министрлігі және Шығыс Қазақстан облысының әкімдігімен бірлесе отырып, жол құрылысына қажетті барлық жер телімін беру мәселесін тез арада шешуді тапсырды. Сондай-ақ қажетті қаражатты бөлуді жеделдету керек екенін айтты.
Ал Ақтау қаласының тұрғындары – ерлі-зайыпты Жалғас Қуатов пен Айсұлу Құрманғазиева кәсіпкерлікпен айналысып, сауда павильонын ашуды жоспарлап отыр. Екеуі де екінші топтағы мүгедек санатында. «Жұмысымызды бастау үшін рұқсат алуға жәрдемдесуіңізді және материалдық тұрғыда көмек көрсетуіңізді сұраймыз», деді Айсұлу Құрманғазиева.
Ерлан Қошанов партияның өңірлік филиалына өтініш берушілерге барынша көмек көрсетуді тапсырды. Мәжіліс төрағасы ерекше қажеттіліктері бар адамдарды жан-жақты қолдау – «Аmanat» партиясының басымдықтарының бірі екенін атап өтті.
Сондай-ақ Ақмола облысы Шортанды кентінің 8 мыңнан астам тұрғыны ауыз су тапшылығын өткір сезініп отыр. Мәселенің шешімін іздеген Серікбол Мерей партия төрағасымен кездесуге келді. «Қолданыстағы жеті ұңғыманың тек төртеуі жұмыс істеп тұр, қалғандарында су қоры таусылған. Әсіресе жаз мезгілінде егістіктерді суаруға және техникалық қажеттіліктерге көп мөлшерде пайдаланылғандықтан су тапшылығы айтарлықтай сезіледі», деді ол.
Ерлан Қошанов бұл мәселені шешу үшін қазіргі уақытта топтық су құбырын тарту жобасы әзірленгенін айтты. Жұмыс көлемі мен оны орындаушылар белгілі болды. «Аmanat» партиясының Мәжілістегі фракциясы су құбыры желілерін қайта жөндеуге республикалық бюджеттен жақын арада тиісті қаражат бөлуді өз бақылауына алады.
Ал елорда тұрғыны, 11 баланың анасы Нұргүл Қадырбаева екі ұлы Арман мен Анас футболдан Қазақстан мен ТМД елдерінде өткен чемпионаттарда жоғары шеберлік көрсеткенін атап өтті. Сөйтіп, олар Португалиядағы «Bsports» жастар клубына өнер көрсетуге шақырту алған. Бірақ қаржылық жағдайдың қиындығына байланысты бара алмай отыр.
Партия төрағасы батыр анаға жас футболшылар үшін қажетті көмек көрсетілетінін айтты. Бұл мәселеге Астана әкімдігі мен Мәдениет және спорт министрлігі де атсалысады. Ерлан Қошанов қаралған барлық өтініш бойынша партия филиалдарына нақты тапсырмалар беріп, олардың шешілуін жеке бақылауына алды.