Заң жобалары таныстырылды

Қаржы вице-министрінің айтуынша, 2024 жылға түсімдер 20,4 трлн теңге деңгейінде болжанып отыр. Аталған қаражат әлеуметтік маңызды және стратегиялық инфрақұрылымдық жобаларды қаржыландыруға бағытталатын болады.

– Бұл – автомобиль жолдарын, жылу, газ және сумен жабдықтау желілерін, инженерлік желілерді жаңғырту, сондай-ақ «Жайлы мектеп», «Ауылда денсаулық сақтауды жаңғырту» ұлттық жобалары аясында бірқатар әлеуметтік нысан салу, – деді А.Бейсенбекұлы.

Бюджет шығыстары 2023 жылмен салыс­тырғанда 1,5 трлн теңгеге ұлғайып, шамамен 24 трлн теңгені құрайды. Оның 40 пайыздан аста­мы әлеуметтік салаға тиесілі. 2024 жылға әлеу­меттік төлемдерге арналған шығыстар 5,3 трлн теңге, халықтың табысын арттыру бағдар­ла­масын іске асыру үшін 2024 жылы 3,5 трлн теңге көзделген.

Отырыс барысында депутаттар бірқатар өзекті мәселені көтеріп, сұрақтарын қойды.

* * *

Мәжілісте Қаржы және бюджет комитетінің төрағасы Мәди Тәкиевтің жетекшілігімен «Қазақстан Республикасының Ұлттық қорынан 2024-2026 жылдарға арналған кепілдендірілген трансферт туралы» заң жобасы таныстырылды.

Заң жобасы бойынша Ұлттық экономика вице-министрі Азамат Әмрин баяндама жасады. Ол кепілдік берілген трансферт мөлшері 2024 жылы барреліне 43,4 доллар, одан кейінгі жылдары барреліне 40,2- 41,8 долларды құрайтын бюджеттік ережелерге сәйкес кесімді бағамен анықталатынын атап өтті.

– Ұлттық қордан кепілдендірілген трансферт жыл сайын 2 трлн тенге мөлшерінде айқындалды. Сондай-ақ Ұлттық қор параметрлерінде 2024 жылғы 1 қаңтардан бастап іске асырылатын «Ұлттық қор балаларға» жаңа әлеуметтік бағдарламасы бойынша балаларға төлемдер міндеттемелері ескерілді, – деді А.Әмрин.

Ұлттық қордың валюталық активтері 2024 жылы 68 млрд доллар, 2025-2026 жылдары 80,7-93,3 млрд доллар деңгейінде болжанып отыр.

Осы заң жобасы бойынша жұмыс тобына Қаржы және бюджет комитетінің мүшесі Мархабат Жайымбетов жетекшілік етеді. Отырыс барысында айтылған ұсыныс-пікірлер одан әрі талқыланып, қарастырылады.