Каспий теңізінің жағалауына таяу маңда жыл сайын шілде, тамызда лотос гүлдейді. Ерекше тропикалық гүлдің кез келген жерде өсіп-өнбейтінін білетін қауым жолы түссе, сол гүлді арнайы барып тамашалайды.
Лотос Ресеймен шектесіп жатқан Құрманғазы ауданында, Қиғаш және Шароновка өзені арнасының дәп Каспий теңізіне құяр сағасында гүлдейді. Қиғаш – Еділден шыққан өзен. Ұзындығы –100 шақырымға жетеғабыл. Бәлкім, Еділ өзенінің тармағы болған соң шығар, онда өсімдіктердің, құстардың, су жәндіктерінің түрі көп. Мұнда «Қызыл кітапқа» енген құстардың 36 түрі бар екен. Ал біз айтып отырған өсімдіктің гүлі, яғни күлтелері ғана көл бетінде қалқып шығады.
Будда ілімінде лотос тазалықтың, жарықтың белгісі саналады екен. Ал қазақ халқы лотосты «шамгүл» деп атаған. Расында да, ми батпақтың арасында өскен лотос тіршілік атаулыны құдды бір өзіне қаратып, нұрын шашып тұратындай. Шамгүлдің Каспий маңына қайдан келіп, қалай жерсініп кеткені жайында болжамдар жетерлік. Соның ішінде негізгі нұсқалардың біріне сүйенсек, лотос Ұлы Жібек жолы арқылы Үндістан мен Қытайдан келіпті. Жергілікті саудагерлер сапар барысында бұрын-соңды көрмеген гүлге тамсанып, тұқымын ала келген. Тұқымын алып келгеннен бөлек, лотос гүлінің қазақ даласына жерсінуінің өзі – таңғаларлық құбылыс.
Реті келгенде лотос гүлін тамашалауға қалай баруға болатынын айталық. Көлігі барлар белгіленген аймаққа Атырау-Астрахан тасжолымен жете алады. Немесе туристік фирма ұйымдастыруымен өтетін «Лотос гулдеуі» эко-турына қатысуға болады. Тек қай бағытпен барсаңыз да, Қиғаш өзенінің саласына дейін 300 шақырым, ары қарай лотос алқабына тағы бірнеше шақырым қайықпен жүзіп өтуге тура келеді. Сапарға шыққандар Ганюшкино ауылының маңындағы демалыс орындарының бірін таңдап, аумақтың көрікті жерлерін алаңсыз араласа болады.